Artatien ka MCTA ïa ka jingkam u Conrad ba ïoh tulop haduh 4.5 lak shibnai
Shillong, Naiwieng 20: Ka Meghalaya College Teachers’ Association (MCTA) ka la artatien ïa ka jingkam jong u Myntri Rangbah ka jylla u Conrad K Sangma ba ki don ki nonghikai kolej deficit kidei ba ioh tulop haduh 4.5 lak shi bnai, da kaba ong ba katei ka jingkhein ka long kaba bakla.
Haba kren ha ki nongthoh khubor mynta ka sngi Thohdieng, u president ka MCTA u Dr Shiv Pradhan u la ong ba ka tulop kaba heh tam jong u associate professor, ka kyrdan kaba heh tam ha ka rukom hikai kolej ha Meghalaya ka long T. 2, 17, 100 lak.Wat la ka don 53 percent ka DA, ka tulop shibnai kan treikam haduh kumba T. 3.32 lak tyngka.
U Pradhan u la kyntu ïa u myntri rangbah ka jylla ban pynshisha ïa ki jingkhein tulop shwa ban ai jingkren paidbah bad kynnoh ïa ka sorkar ba ka la thaw ïa ka jingiapher hapdeng ki nonghikai deficit bad ki nonghikai SSA da kaba pyni ïa kiba mynshuwa kum kiba siew palat.
U la ong ba ha ka jaka ban peit ïa ka rukom ai jingiarap jong ka deficit grant-in-aid, ka sorkar ka dei ban pynbha ïa ka tulop bad ka jingshakri jong ki nonghikai SSA katkum ka jingtbit bad ka jingshemphang jong ki.