U Bah Lakmen um don jingkitkhlieh, u Bah Prestone um sngewthuh ïa ka jingbakla ther ki nonghikai Deficit
Nongpoh, Naiwieng 19: Ki nonghikai Deficit na Ri-Bhoi hapoh ka lama ka Khasi Jaintia Deficit School Teachers Association (KJDSTA) haka jingbteng jong ka jingïakhih mynta ka sngi kila ïalum biang ha madan NSCA Pahamsyiem ban pynurlong ïaki mat dawa naka sorkar ban pynlait mardor ïa ka DA naduh u snem 2025, ban pyndam noh ïa ka skhim 2026, ban pyntreikam ïaka skhim 2023 bad ka CPF katkum ka act jong u snem 1969 bad ruh ban buh biang ïa ka Board of Trustees na ka bynta ki nonghikai bad nongtrei ha ki skul deficit.
Na ka liang ki nonghikai haba kren ha kane ka sngi kila ther tyngeh ïaka sorkar ba ki myntri kiba shong haki shuki imat ki kyllut bad kim iohsngew ïaka jingud jingnam jong ki nonghikai bad ka jingshah ktah jong ki khynnah skul kiba dang pynkhreh ïaki eksamin bapher bapher, khamtam ïa u Bah Prestone Tynsong Symbud Myntri Rangbah ka jylla halor ki jingkynthoh jong u bad u Bah Lakmen Rymbui Myntri ka tnad pule puthi u bym shym la kren wat tang shi kyntien ruh haduh mynta naduh ba sdang ka jingïakhih.
Kila ong ruh ba ngi dap da ka jingsngewsih bad kthang ka mynsiem ban iehnoh ïaki khynnah haki skul bad tip kumno ki ïa long hynrei kaba sngewlyngngoh ka long ba ka sorkar haduh mynta ka sngap man man ïaki jingdawa ka kynhun ki nonghikai namar kila pynpaw ba kim don lad shuh lait noh tang ka jingïakhih nakadaw ka jingleh shilliang bad ka bym hok jong ka sorkar.
“Imat ka sorkar ka kmen haba ngi mih sha surok namar haduh mynta kam don kano kano ka jingshimkhia ïaki mat dawa jong ki nonghikai, bad kane ka pyni ba u Myntri ba dei peit ïaka tnad pule puthi um don ka jingkitkhlieh ïa ka tnad baroh kawei kaba dei ka daw ba ka pule ka puthi haka jylla ka hiar arsut, la ong ki nonghikai.
Halor ka jubab u Bah Prestone ba um shym la kren ïa baroh ki nonghikai hynrei ïaki nongïalam ka KJDSTA, naka liang ki nonghikai Deficit na Ri-Bhoi kila ther kylla haka jaka ba un sngwthuh ïaka jingbakla ong pynban ba thew tang ïaki nongïalam bad halor ka jingkren u Bah Prestone ba ki nonghikai ki dei ki kruiñ bad ki sohpyut kiba pynhiar ïaka pule puthi haka jylla, naka liang ki nonghikai kila jubab ba dei ka sorkar kaba pynhiar dor ïaka pule puthi haka jylla haduh mynta kam pat don ïaka Education Policy kaba biang bad naka por shaka por la pynkylla ïaka rukom pass ïaka eksamin SSLC naka Best of Five mynta la pynkylla biang sha ka Best of Six ba ki khynnah ki hap ban pass lut baroh ki sobjek.
Kila ong ruh ba mynshuwa ym ju don ba pyndonkam Guidebook bad ki nonghikai kim ju shah hynrei mynta namar ba ka sorkar ka sngewrem ba ka pule puthi ka hiar sha trai hap ban pyndonkam da ki Guidebook bad la pynmih ïaka CM-Impact bad ruh ïaki MCQ ba ki khynnah kim kwah shuh ban trei shitom, namarkata kum ki nonghikai kila kren da kaba shai wat ju kren bad peit poh ïaki nonghikai deficit lym da don ki skul deficit ha Ri-Bhoi kan long ka jingdum namar ym don skul sorkar kaba lah ban shakri bad ai ka jingnang jingstad sha ki khynnah pule ka dong bad ka thaiñ.