Shen yn lait thylli sa kumba 2000 tylli ki kam pulit, pyntip u CM ba yn pynbha shuh ïa ka rukom thungkam pulit
Shillong, Naiwieng 19 : Ka Sorkar Jylla ha ka sngi Palei ka la mynjur ïa ka jingpynkylla ïa ki kyndon thungkam ha ka tnad Pulit ka jylla bad ruh ïa ka jingpynbeit thymmai ïa ka Central Recruitment Board, kaba plie lad ïa ka jingthungkam kaba thymmai na ka bynta kumba 2,000 tylli ki kam kiba thylli ha ka kynhun pulit jong ka jylla.
Haba pyntip ïa kane ka rai hadien ka jingïalang jong ka Kynhun Myntri, na ka liang u Myntri Rangbah ka Jylla, u Conrad K Sangma, u la ong ba kine ki jingpynkylla ki thmu ban pynsuk ïa ka rukom thungkam, pynbha ïa ka jingtreikam ha ka liang ka jingpynïaid kam bad pynthikna ïa ka jingwanrah lang ïa kiba bun ki bynta ha ka rukom jied.
Haba batai halor ka jingpynbeit thymmai ïa ka Central Recruitment Board, u Myntri Rangbah u la ong ba la pynheh ïa ka Board da kaba pynrung ïa ki dkhot thymmai khnang ban pynlong ïa ka kaba kynthup lang bad kaba ai lad ïa kiba bun ki kynhun ban ïashim bynta.
” Ka jingthungkam ka dei ka kam kaba heh bha. Namar kata, ngi la pyrshang ban pynthikna ba yn lah ban kynthup lang ïa kiba bun ki ophisar, ki thaiñ bad ki jaka bapher bapher,” u la ong.
U la pyntip ba ki nongmihkhmat na ka Western Range bad Eastern Range, ryngkat bad ki dkhot kiba don ïa ka jingshemphang ha ki bynta technical, la pynrung lang sha ka Board.
Hynrei u la pynshai ba wat hadien ba la pynheh ïa ka jingdon ki dkhot, ka nongrim bad ka rukom treikam jong ka Recruitment Board kan dang sah kumjuh.
Haba kren halor ki jingpynkylla ïa ki kyndon thungkam, u Myntri Rangbah u la ong ba ka sorkar ka la pynbeit thymmai ïa katto katne ki bynta, kynthup ïa ka bai registration, ki kyndon jong ka physical examination bad ka jingjied ïa ki jaka pynlong eksamin.
“Don katto katne ki jingpynkylla kiba donkam ban leh ha ka rukom thungkam, kynthup ïa ki jingpynbeit ha ka bai registration, ka physical examination bad ki jaka pynlong eksamin,” u la ong.
U la bynrap ba ïa kine ki jingpynkylla la shim hadien ka jingïatai bad jingïabishar bniah, katkum ki jingai jingmut jong ka tnad Home (Police).
“Ka thong jong ngi ka long ban pynbeit ryntih ïa ka rukom treikam, ban pynlong ïa ka kaba kham khlaiñ, kham treikam bha bad kham paka, khnang ban pynduna ïa ki jingeh ha ka rukom pynïaid kam,” u la ong.
Haba batai ïa ka jingdonkam ban pynsted ïa ka jingthungkam, u Myntri Rangbah u la ong ba watla ka sorkar ka la thungkam ïa kumba 3,000 ngut ki nongtrei pulit ha u snem ba la dep, hynrei kumba 1,800 tylli ki kam ki la sah thylli ha kine ki snem ba la dep.
U la ong ruh ba la khmih lynti ba sa 100 haduh 200 tylli ki kam kin sa lait shuh shuh, kaba lah ban pynpoi ïa ka jingdon jong ki kam kiba thylli sha kumba 2,000 tylli.
“Kumba 2,000 tylli ki kam yn sa pynmih advertisement shen na ka bynta ka tnad pulit,” u la bynrap biang.