Shongthait noh ka Kong Nongrang kum ka DGP kynthei ba nyngkong eh ka Jylla

Kynmaw burom ïa ki 120 ngut ki pulit ba aiti la ka jingim

0

Shillong, Naiwieng 19 : Ka Director General of Police (DGP) kynthei ba nyngkong eh jong ka Meghalaya, ka Kong Idashisha Nongrang hynne ka sngi Palei ka la shongthait noh na ka kam kum ka hehduh jong ki pulit ka Jylla hadien ka jingshakri kaba la kot haduh 30snem ha ka tnad.
Ha kane ka sngi, baroh ki heh pulit jong ka jylla ki la ïa lum lang khrui ha 1st MLP Battalion ha Mawiong ban ai burom kyrpang ïa kane ka hehduh ki pulit bad ruh ban ithuh ïa ka jingnoh synñiang jong ka ha ka kynhun pulit.
Haba kren ha ka jingïalang, ka Kong Nongrang ka la phai dien sha ka jingïaid lynti jong ka kaba la sdang ha u bnai Rymphang 1993, da kaba pynpaw ïa ki jingsngew shem mynsiem ha kane ka sngi kaba khatduh jong ka ha tnad.
“Da kaba la shakri palat 30 snem, nga ieng hangne mynta ha kane ka sngi kaba khatduh jong ka jingshakri da ki jingsngew bynnud,” ka la ong.
Ka la kynmaw ïa ka por ba ka la rai ban rung sha ka kam pulit, haba u kpa jong ka u la kyntu ïa ka ban pyrkhat bha shwa ban iehnoh ïa ka kam kaba ka la don lypa.
“I Pa jongnga i la ong, ‘Phi dei ban pynthikna bha ba kane ka dei kaba phi kwah,’ namar ba nga la don lypa ha ka kam,” ka la ïathuh ha ka jingialang. Ha kajuh ka por pat ka la ong ba ka sngewkmen ban phaidien bad ïohi pat ba hadien 30snem ba ka don ha ka kam ka shem ba ka la shim ïa ka rai kaba ka hun jrut ban don ha ka tnad pulit
“Hadien palat 30 snem, hooid, kane ka dei kaba nga la kwah, bad nga sngewkmen shibun ba nga la rung sha kane ka jingshakri,” ka la ong.
Ka Kong Nongrang ka la batai ba ka jingdon ha ka tnad pulit ka la ai ïa ka bun ki lad ban roi bad ban noh synñiang na ka bynta ka bha ka miat jong ki paidbah.
Ka la ong ruh ba ka nongrim jong ka jingshakri jong ka ka long ban trei hok khnang ba kan ym babe ynda ka la phaidien ïa ki kam ba ka leh ha ka por ba ka don ha ka kam.
Kane ka heh pulit ka la pynpaw ruh ïa ka jingsngewsarong halor ka jingjop jong ka Meghalaya Police ha ka jingïakhun pyrshah ïa ki kam bymman bad ki kam pyntriem ha ka jylla.
Ka la kynmaw burom ruh ïa palat 120 ngut ki pulit kiba la aiti ïa la ka jingim ha ka jingshakri, da kaba ong ba dei lyngba ki jingnoh synñiang bad jingaiti lut jong ki ba ka kynhun pulit ka lah ban pynpaw ïa ka jingsarong.
Haba pynkut ïa ka jingkren, ka la ai khublei ïa baroh ki pulit na ka bynta ka jingïatreilang ban pynneh ïa ka aiñ bad ka shongsuk shongsaiñ, bad ban bud ïa ka motto jong ka tnad.

Leave A Reply

Your email address will not be published.