Syed Mushtaq Ali Trophy 2026-27: Pynliem ka Meghalaya da 35 ron ïa ka Arunachal Pradesh

0

Shillong, Naiwieng 20: U Raj Biswa u la khyrwit 86 ron ban ïarap ïa ka Meghalaya ban pynliem ïa ka Arunachal Pradesh da 35 ron ha ka jingïalehkai plate group kaba saw jong ka ha ka Syed Mushtaq Ali Trophy 2026-27 hynne ka sngi ha Sovima, Nagaland.
Hadien ba ka la shah pyntied nyngkong, ka Meghalaya ka la buh ïa ka thong kaba 179 ron da kaba hap 3 wiket haduh kaba kut jong ki 20 ober, katba ka Arunachal ka la lah ba kan jubab tang 144 ron bad khyllem 6 wiket.
U Raj Biswa u la lamkhmat ïa ka tied na ka bynta ka kynhun da kaba kamai 86 ron naki 57 tylli ki bol, ka ron kaba heh tam bad ka half-centuri kaba nyngkong jong u ha ki jingïalehkai kriket T20 jong ka BCCI. U la khyrwit 10 tylli ki saw ron (four) bad lai tylli ki hynriew ron (six).
U la don bynta ha ki ar tylli ki jingïatreilang kiba lah ban kyntiew 50 ron tam ïa ka kynhun – kaba nyngkong kadei ka 58 ron shuwa ban hap u wiket uba ar ryngkat bad u Nishanta Chakraborty (24 ron naki 15 bol) bad nangta 54 ron shuwa ban hap u wiket uba lai ryngkat bad u Josiah Momin (32 ron not out naki 23 bol). Nangta u Josiah u la ïatreilang bad u Akshay Karnewar (26 ron not out naki 16 bol) ha kaba kut ban pynïoh ïa ka Meghalaya ïa ka thong ba ka lah ban ïada.
Ka Arunachal kaba don sha trai duh, kaba la shah rem ha baroh lai tylli ki jingïakhun jong ka, ka la shah khanglad tang na ka bynta 144/6, bad dei tang u Salil Malhotra uba kham seisoh ha ka tied da kaba kamai 61 ron khlem shah pynhap na ki 47 tylli ki bol.
Napdeng ki nongkawang bol jong ka Meghalaya, u Akshay u la khur 2/24 haki 4 ober, katba u Amiangshu Sen (khur 1/8 haka 1 ober), u Manish Sharma (khur 1/25 haki 4 ober), u Akash Choudhary (khur 1/27 haki 4 ober) bad u Swarajeet Das (khur 1/36 haki 3 ober) ki la ïoh ban khur mar shi wiket.
Ka Meghalaya mynta ka don ha ka kyrdan kaba ar ha ka miej kheiñ point jong ka plate group bad kan ïakhun ïa ka jingïalehkai kaba khatduh jong ka round robin ha ka Sngi U Blei pyrshah ïa ka Sikkim ha ka por 8 baje mynstep.

Leave A Reply

Your email address will not be published.