22 ngut ha ki ar sngi leh surgery ki doktor ha ka Free Laparoscopic Rural Surgery Camp

0

Mawkyrwat, Naiwieng 20: Ka East Zone AMASI, ha ka jingïatreilang bad ka NECASI (Meghalaya Unit) bad ka Nazareth Hospital, Shillong, ka la pynlong ïa ka Free Laparoscopic Rural Surgery Camp ha Civil Hospital Mawkyrwat ha ki 18 bad 19 tarik u ‘Naiwieng, 2026.
Katkum ka jingïathuh u Dr. D. Suting, General Surgeon ha Civil Hospital Mawkyrwat u la ong ba ha kane ka prokram ba ar sngi ki la don haduh 22 ngut ki nongpang ki la ïoh ban shah puid lyngba ka rukom Laparoscopic Surgery hapoh Civil Hospital Mawkyrwat.
U la ong shuh shuh ba ïa kane ka prokram la pynlong da ka jingthmu ban ai jingshakri ïa ki paidbah nongshong shnong ha ka liang ka koit ka khiah lyngba ka jingsumar bad ka jingshah puid ei khlem da donkam ban siew pisa, khamtam eh ïa ki paidbah kiba donkam ki lad jingïarap, khnang ba kin ïoh ïa ki jingsumar kiba paka.
Shuh shuh u la pynkynmaw ruh ba ka Laparoscopic Surgery ka dei kawei na ki rukom puid kaba pyndonkam da ki tiar jong ka juk ba mynta kiba don ïa ka jingpyni kum ka dur khih ne camera ban puid briew. “Lyngba kane ka prokram, ka kynhun jong ki doktor bad ki nongtrei ka koit ka khiah ki la wanrah ïa ka jingshakri kaba kordor sha ki paidbah jong ka thaiñ Mawkyrwat bad ki jaka ba marjan, khamtam ïa kito kiba shem jingeh ban leit sha ki jaka sumar kiba kham jngai”, ong u Dr. Suting.
Ha kaba ïa dei bad ka jingsumar ïa ki briew ne puid ïa ki nongpang, u Dr. D. Suting u la ïathuh ba ki Doktor na Bethany Hospital, Ganesh Das Hospital, Civil Hospital, Shillong bad Civil Hospital, Mawkyrwat ki la lah ban pyndep haduh 22 ngut ki nongpang da kaba ki la lah ban weng noh ïa ki jingpang bapher bapher kum ïa ki maw-khyllai, kiba don ïa u Appendix, Mawksang bad kiwei de ki jait jingpang kiba don ha ka met u briew.
Namarkata, u Dr. D. Suting um lah khlem da pynpaw ka jingsngewnguh ïa u Dr. Jayanta Das bad ka team baroh kawei nangta ïa ki doktor na Civil Hospital Shillong, na Bethany bad na Ganesh Das Hospital kiba la long ka daw bah ban poi sha ka thong jong ka jingjop ha kine ki ar sngi ban sumar ïa ki briew ki pang ba shitom.

Leave A Reply

Your email address will not be published.