Saw ngut ki samla pule na ka St. Xavier’s College ki la poi sha ka kyrdan top 10
Mawkyrwat, Naiwieng 19 : Watla ka St. Xavier’s College ka dang don tang hynriew snem, hynrei ka jingjop jong ngi ha ka liang ka pule puthi ki kren hi shaphang jong ki.
Ka sdang nyngkong eh na i Bashimti Snaitang, kaba la ïoh ïa ka kyrdan ba 10 ha ka Political Science ha u snem 2024, bud pat sa i Ribhalin Syiemlieh, kaba la ïoh ïa ka kyrdan ba 7 ha ka Education ha u snem 2025.
Ha u snem 2026, ka batch kaba lai jong ngi ka la buh ïa u mawmer bakhraw lyngba ki saw ngut ki Samla pule kiba la poi sha ka kyrdan top 10 ha ka University. Napdeng ki 44 ngut kiba la pyndep ïa ka jingpule: u Pyndapbor Wartde (kyrdan ba 2 ha English), i Manosha Wahlang (kyrdan ba 4 ha English), i Kyntimery Jyrwa (kyrdan ba 4 ha Education) bad u Khlainborlang Marwein (kyrdan ba 10 ha History).
Halor kane ka jingjop jong ki samla pule u Dr. Sunny Augustine, SJ – Principal jong ka St Xavier’s College, Umoid u la ong ba ka jingjop jong ki kam shym la jia kynsan lane da kaba shu jia ryngkhat hynrei ka dei lyngba ka jingtrei shitom, ka jingminot jong ki samla pule bad lyngba ka jingïakyrshan ba radbah jong ki nonghikai.
Kumta ula ong ba ka long kaba dei ban ai ka jingïaroh ïa baroh ki samla pule kiba la ïoh ïa ki kyrdan bapher bapher ha ka skul bah NEHU, ïa ki nonghikai kiba la trei shitom bad ïa ka ïing ka sem jong kine ki samla pule.
Namarkata, ai ba kane ka jingjop kan long ka jingai mynsiem ïa ka pateng ka ban wan bad ban pyni ba ma ki ruh kin lah ban pyrthuh bud ïa ka nuksa babha ki ki la kdew shakhmat. “Ha kane ka shlem ai jinghikai ka St. Xavier’s College, ngim pyntbit ïa ki tang ha ka pule puthi, hynrei ngi ai ruh ïa kiwei pat ki jinghikai ban kyntiew na ka bynta ka lawei jong ki”, ong u Dr. Sunny Augustine, SJ – Principal jong ka St Xavier’s College, Umoid.