Mawkyrwat, Rymphang, 22: U District Magistrate ka South West Khasi Hills District, Mawkyrwat u la ai ïa kane ka jingpynbna paidbah ba hadien ba la pynbna ïa ka General Election sha Meghalaya Legislative Assembly 2023 ka ban long ha ka 27 tarik u Rymphang, 2023 bad hadien ba la pyntreikam ïa ka Model Code of Conduct (MCC) bad kiwei pat ki jingbthah jong ka Election Commission ha baroh kawei ka distrik u la pynjari ïa kane ka hukum ha kaba ïa dei bad ki kynta jong ka jingjarjar (Silence Period) ha ki 48 kynta ba khatduh ha shwa ban kut ka jingïathep vote kaba mut ba kane ka kynta jong ka jingjarjar (Silence Period) kan sdang naduh ka 4 baje janmiet jong ka 25 tarik u Rymphang, 2023 ha kaba la khang ïa baroh ki Election Campaigns bad ki jingïalang paidbah bad ka jingpyndonkam ïa ki kor pynsawa, na kaba sam ïa ki pamphlets bad kiwei kiwei, kaba wah ïa ki flags/banners bad kiwei kiwei hapoh ka 200 meters jong ka Polling Booth bad ka jingbuh ba shipor ïa ki party ophis hapoh ka 200 meters na Polling Booth.
Ym shah ban pynlong ki jingïalang paidbah ne ka jingïa-ïaid paidbah. La khang ruh na kaba rah ïa ki suloi bad kiwei pat ki tiar pynmynsaw bad ban kiar na kaba pynmih kino kino ki jingjia kum ban pyntieng ne pynbor ïa ki nongthep vote bad ïa ki paidbah kumjuh. La khang ruh na kaba ïalang palat ïa ka 5 ngut ha kawei ka jaka bad ym shah ban don kiwei pat ki riew saiñ pyrthei kiba na shabar ka constituency, hynrei la shah ïa ki kyrtong ban rung ha man la ki thliew ïing hapoh kine ki 48 kynta ha shwa ban kut ka jingïathep vote.
Kane ka hukum kan treikam naduh ka 4 baje janmiet jong ka 25 tarik u Rymphang, 2023 tad haduh ban da kut ka elekshon.
