Mawkyrwat, Risaw 08: Ka District Mental & Health Programme (DM&HP), South West Khasi Hills, ha ka jingïatreilang bad ka District Hub for Empowerment of Women (DHEW), South West Khasi Hills District, Mawkyrwat, bad ka CLF Ha-pneh U Kyllailongsngun, ka la pynlong ïa ka jingïakynduh paidbah ban rakhe ïa ka World Mental Health Day 2026 ha Umdohun Market, South West Khasi Hills District.
Ïa kane ka prokram la pynlong hapoh ka phangpdeng, “Lived Experiences Heard: Real Voices, Real Change,” da ka jingthmu ban pynsngewthuh bad ai jingtip paidbah shaphang ka koit ka khiah ha ka liang ka jingmut jingpyrkhat (mental health), bad ban kyntu ïa ki paidbah ban kren paidbah halor ki jingshem jong ki bad ban wad ïa ka jingïarap kaba biang haba donkam ki lad jingïarap.
Ka kong B. Snaitang, Psychiatric Nurse jong ka DM&HP, South West Khasi Hills District, ka la kren bad ai jingbatai halor ka phang ba la buh bad ka la pynpaw ïa ka jingdonkam ban sumar bad ban pynneh ïa ka koit ka khiah ha ka liang ka jingmut jingpyrkhat. Kumta ka la kyntu ïa kito kiba mad ïa ki jingeh ha ka liang ka jingmut jingpyrkhat ba kin wan shakhmat bad wad ïa ka jingsumar kaba dei lyngba ki lad jingshakri ka koit ka khiah kiba don. Ha kajuh ka por ka la ai jingtip ruh sha ki paidbah shaphang ka jingdon jong ka Tele-MANAS Helpline, kaba dei ka lad ban ai ka jingïarap bad jingsumar ha ka liang ka koit ka khiah jong ka jingmut jingpyrkhat.
Hadien kata, bud sa ka jingïakren halor ka jingïaleh pyrshah ïa ka jingshah leh donbor ki kynthei, na ka kong Werialty Lyngdoh Peinlang, Case Worker, One Stop Centre (OSC), District Social Welfare Office, Mawkyrwat kaba la batai shai halor ki jingshakri bapher bapher kiba la pynbiang bad ai da ka One Stop Centre bad ka la kyntu ïa ki kynthei bad kiwei pat kiba donkam jingïarap ba kin wan mih sha ka ophis ban ïoh ïa ka jingïarap bad jingshakri kaba donkam.
Ka la batai ruh shaphang ki hok jong ki kynthei bad ki aiñ kiba ïadei bad ka jingshah leh donbor ki kynthei, da kaba ban jur ïa ka jingdonkam ban ïada ïa ki kynthei na kino kino ki jait jingshah leh donbor, jingshah lehbeiñ bad jingshah pynshitom, ha ïing ha sem, ha jaka trei bad ha ki jaka paidbah.
Ka la don ruh ka jingkren ban pynshlur ïa ki paidbah nongshong shnong na u bah F. Lyngdoh Langrin, Sordar Shnong Umdohlun, ryngkat bad ka jingïadon bynta u bah Adelbert Marbaniang, Cluster Coordinator, Umdohlun Area.
Ha kane ka sngi, ka PHL Group ka la pyni ïa ka drama lyngkot kaba kyrteng “Ka Bor Na Lade”, bad ka Tyllilang VO Mawkhlaitngap ruh ka la pyni ïa ka drama kaba kyrteng, “jinglehkhuid leh suba ïa ka sawdong sawkun”.
Ïa ka prokram la pynïaid da ka kong N. Marbaniang, M&EO, District Mental & Health Programme (DM&HP), South West Khasi Hills, bad u bah Valdony E. Lyngdoh Mawlot, Gender Specialist, DHEW, District Social Welfare Office, Mawkyrwat, u la ai ka jingkren khublei.
