Da ka thup bathymmai jong ki kyrtong yn pynkhreh ka NPP na bynta ka elekshon MDC ha GHADC

Shillong, Risaw 08 : Ka National People’s Party (NPP) ka la shim ïa ka rai ban sdang biang ïa ka jingpynkhreh da kawei pat ka thup kyrteng jong ki kyrtong kiban aireng ha ka elekshon MDC ha GHADC, hadien ba la pynbeit thymmai ïa u pud u sam jong baroh 29 tylli ki constituency ha katei ka thain.
Ïa kane ka rai ban pyndam noh ïa ka thup kyrteng ba la dep pynbna mynshwa la dep ruh ban bthah da u State President ka NPP, u Bah Prestone Tynsong.
U State President ka party, u Prestone Tynsong, u la pynmih ïa ka hukum ban pynduh noh ïa ki artylli ki thup kryteng kiba la pynmih ha ka 16 tarik bad 4 tarik Lber, hadien ka jingai jingmut na u Working President uba dei peit ïa ka Garo Hills, u Marcuise N. Marak.
Ha ka hukum jong u, u President u la ong, “Ïa ka notification… la pyndam noh naduh naduh mynta hi. Kane ka long kaba donkam namar ka jingpynbeit thymmai ïa ki 29 tylli ki constituency jong ka GHADC.”
Ha ka jingpyntip sha ki lad pathai khubor na ka liang ka party ka la ong ba ka rai ban pynkylla ïa kane ka thup kyrteng ka la mih na ka jingïalang kaba la pynlong ha ïing jong u Myntri Rangbah ka jylla, u Conrad K. Sangma, ha u bnai Nailur. Ha katei ka jingïalang ki la donlang ruh u Lamphang ka Iing Dorbar Thawaiñ ka Jylla, u Thomas A. Sangma, bad ki nongïalam ba hakhmat jong ka party.
Ha kajuh ka por na ka liang u Marcuise N. Marak, u ba peit ïa ka jingtreikam jong ka party ha rilum Garo u la ong ba ka jingpynbeit thymmai ïa ki constituency ka la pynlong ïa ka party ban pynduh noh ïa ki kyrteng kiba la jied mynshwa.
Kane ka jingkylla ka wan ruh ha ka por ba ka samoi treikam jong ka GHADC ka la shah pynjlan sa hynriew bnai, kaba ai por shuh shuh ïa ki party ban pynkhreh ïa ka elekshon.
Na ka liang ka NPP, mynta ka jingpynkhreh ka long ban jied ïa ki kyrtong kiba lah ban ïakhun ha ki constituency thymmai. Halor kane na ka liang u Marcuise u la pyntip ruh ba ïa ki kyrteng thymmai yn sa phah sha u State President ban ïoh ïa ka jingmynjur.