Ka jingtrei ka long kaba torti bad bym shngaiñ lap ka FKJGP ha ka jingjurip ïa ka JNV Mawsynram

Mawkyrwat, Risaw 04: Ka Federation of Khasi Jaiñtia & Garo People’s (FKJGP), South East Khasi Border Circle ha ka jingïalam u Bah Kyrmen Shangdiar President ka Circle ka la hiar ban jurip ïa ka JNV Mawsynram namar ka jingïai pynslem ban pynkynriah lane shift sha ki jingtei (Building) kiba thymmai naduh ka jaka hikai, jaka sah ki khynnah bad ruh ki nonghikai ne staff ha katei ka skul.
Ka jingpynlong ban jurip jong ka FKJGP ka long halor ka jingpynkheiñ jong ka CPWD ïa ka kular ba kin phah pynkloi ban trei dep bad la kular myn shem snem 2025 ha ka jingïakynduh ban pynkloi bad ban rah noh ha lane shuwa u bnai Jymmang, 2026 pynban la ïohsngew ba ki khlem pat lah ban pynkynriah na ki daw jong ka jingdang suki ka kam ban pyndep.
Ha kane ka jingjurip la lap ruh ïa kawei ka jingpyntrei jong ka Phase-B ba la khmih da ka tnad na Manipur ka MTDC Ltd., da u contractor na Assam ba la pyntrei ïa ki jaka sah jong ki staff la lap ba ka jingtrei ka long kaba torti bad ka bym i shngaiñ satia namar ka jingdon ki jingorpait bad ki jingbym skhem ha ka foundation bad ka jingbym biang ka thew ka woh ka seng ka lap ba ka jingtei long kaba kynriang naduh ki païa, ki bim ki kynroh ruh kumta ka seng shen kan sa leit ban buh da ka jingthoh kum ka jingujor ha ki bor badei peit ïa katei ka jingpyntrei namar kan sa buh ka jingma ïa kiba sah bad kiba pyndonkam ia ka.
Katba ïa ka phase-A ba la pyntrei da u Contractor khasi ka kam ka la jan dep naduh ka School building, Hostel khynnah kynthei, jaka ai bam ia ki khynnah, jaka u Principal bad kaba sah khyndiat ka dei tang ka hostel lane ka jaka sah ki khynnah shynrang bad kiba bun ki lah dep.
Ka seng ka kyntu ïa ka CPWD bad ka JNV Regional Office Shillong ban shimkhia bad kumjuh ïa ka MTDC ban bud ïa ki kam haba la shimti da ki contractor khnang ba ka kam kan da long shisha kaba skhem bad ka jingkyrkhu bad kaba myntoi ïa kiba ïoh ban pyndonkam ïa ka.