Khynra ka HYC ïa ka karkhana saiñ dewïong ha Maweit mih da ki bar jylla ba biang kot

Nongstoiñ, Risaw 04: Ka Hynñiewtrep Youth Council Maweit Circle hapoh ka jingïalam jong u samla Shemphang Tyrsa President bad u Samla Lambor Paliar President HYC Wahlyngdoh Area Unit, lem bad ki para dkhot ha ka sngi saitjaiñ ki la hiar ban leit jurip ïa ka karkhana saiñ dewiong lane Coke Factory kaba don ha Mawlangteh, Rimynniar
Ha ka jingkhynra jong ka seng kaba long ruh kum shibynta jong ka Sier Lapalang Operation jong ka Seng, ka la lap pynban da ki bar jylla kiba don ha katei ka jaka, kaba la pynkhreh shait shait ruh mynta ban sdang ban trei noh ïa ka karkhana.
Na ka liang ka seng lyngba ka jingthmu ban jurip ne khynra ka long ban leit peit ïa ki kot ki sla jong ki bar jylla kiba trei ha katei ka Coke Factory. Tangba ha ka jingkhynra, la lap ba ki kot ki sla jong kitei ki bar jylla ki long kiba biang.
Ha u kyrwoh khubor, na ka liang ka HYC Maweit Circle u samla Shemphang Tyrsa, President u la ong, “Lada phi peit ïa ka jingïaid lynti jong ka jingwan rung ki bar jylla khlem akor ha ka jylla jong ngi, ka long kaba sngewsih. Kumta ka Seng lyngba kane ka operation kan ïai bteng ban khynra ha man la ki jaka trei, ki jaka shong ki bar jylla, khnang ban pynthikna ba ki kot ki sla ki long kiba biang bad katkum ka aiñ. Ngi kwah ba ki trai karkhana ruh ki dei ban pynthikna ba kim dei ban wanrah ïa kino kino ki bar jylla khlem ki kot ki sla kiba biang”.
U la bynrap ruh ba kane ka jingkhynra kan ïai bteng ha baroh ka thaiñ jong ka Maweit Circle. Ka jingai por ruh kan long thik shitaiew bad lada kim lah ban pynbiang yn beh noh ïa baroh khlem jingmap.
Hynrei ka jingkylli pat ka long hato naei kane ka karkhana ka ïoh dewiong ban pyntyllun haba haduh mynta mynne ruh kam shym pat la don satia ka jingpyntip kaba shai lane kaba la pynthikna ban tih dewiong ?.