Lum lang ka MACS ïa ki doctor na kylleng ban tylli ka bor ïakhun ïa ka HIV ha Meghalaya

0

Shillong, Naiwieng 21 : Ban pynkhlaiñ ïa ka jingïatreilang hapdeng ka jingshakri paidbah bad ka jingsumar ha ki jaka ai jingsumar, ka Meghalaya AIDS Control Society (MACS) ka la pynlong ïa ka jingïasyllok kaba kyrpang halor ka phang “Synchronising HIV Response Among Health Practitioners” ha Banquet Hall, State Guest House, Taraghar, Shillong.
Ha kane ka jingïalang la wan ïashim bynta da ki doktor na ki hospital shimet, ki jaka sumar jong ka Sorkar, ki clinic shimet bad ki kynhun jong ki doktor, da ka jingthmu ban pynkhlaiñ ïa ka jingïadei ha ka jingphah ïa ki nongpang sha ki jaka sumar bad ban kiar na kino kino ki jingduh noh ïa ki lad jingïarap ïa kiba don ïa ka jingpang HIV.
Hadien kane, u Dr. K. L. Iawbor, Project Director jong ka MACS bad Joint Director jong ka DHS, u la banjur ïa ka jingdonkam jong ka jingïatreilang hapdeng ki nongai jingsumar ha Meghalaya ban pyntreikam ïa ka Mission AIDS Suraksha.
U pynshai ruh ïa ka jinglong jingman jong ka Meghalaya ha kaba ïadei bad ki thong 95-95-95 jong ka NACO.
Hadien kane, u Bah Barnari Mawlong, IAS, Secretary, Health & Family Welfare Department ka sorkar jylla u la pynpaw ba ka jingjop kaba neh ha ka koit ka khiah paidbah ka lah ban urlong tang lyngba ka jingïatreilang hapdeng ki bor pynïaid bad ki nongtrei kiba ai jingsumar ha ki jaka sumar.
Ïa ki lai tylli ki bynta jong ka jingïalang halor ki mat kiba ïadei bad ka HIV la pynïaid da u Dr. Bitra George, Senior Technical Adviser, FHI India:
Ha ka bynta ba 1 (Ka jingtip thymmai halor ka HIV): La ïakren ïa ki jingshisha kiba kongsan halor ka HIV, ka jinglong jingman jong ka jingpang ha ka ri bad ha Meghalaya hapoh ka National AIDS Control Programme (NACP), bad ki jingbthah ba thymmai halor ka jingsumar da ki dawai Antiretroviral Therapy (ART).
Ha ka bynta 2 (Ka Aiñ bad ka Jingkitkhlieh): La ïakren halor ka HIV/AIDS Act na ka bynta ki nongsumar, khamtam ka jingmynjur da kaba tip shai, ka jingïada ïa ki jingtip shimet jong ki nongpang, ka jingsumar kaba hok bad ki jingïada hapoh ka aiñ.
Ha ka bynta kaba 3 (Ka jingïatreilang ban ym don kiba duh ïa ki jingsumar): La pynshai ïa ki jingbthah ba thymmai halor ka jingïasyllok bad ka jingtest HIV, ka jingsumar ïa ki jingpang STI, bad ka Elimination of Vertical Transmission of HIV and Syphilis (EVTHS).
Hadien ki jingïakren kiba bniah, ka MACS bad ka FHI India ki la pynlong lang ïa ka jingïakren paidbah halor ka bynta ban kylli jingkylli bad don ruh ka jingjubab. Halor kane ki doktor bad ki stad sumar ki la ïasam ïa ki jingshem bad ki jingai jingmut ban pynsuk ïa ka rukom phah nongpang sha ki jaka sumar.
Shwa ban pynkut ïa ka jingïalang, ka Dr. Chinmoyee Das, CMO/HOD ha NACO, ka la ïasam ruh ïa ki jingmut bad jingshem jong ka.
Ïa ka jingïalang la pynkut da ka jingkren na u Dr. L. W. Myrthong, Additional Project Director, MACS, uba la ïoh jingïaroh halor ka jingpyrkhat bad ka jingpynlong ïa kane ka jingïakynduh lang ban ïasyllok.
Kane ka long katkum ka kyrwoh ba la phah da u Project Director Meghalaya SACS, Shillong.

Leave A Reply

Your email address will not be published.