Ïoh jinghikai ki Hospital Administrator na ki 5 jylla ban pynkhreh halor ki jingjia ba kyrkieh

0

Shillong, Naiwieng 21: Ka NEIGRIHMS Shillong ka la pynlong ïa ka jinghikai kaba 6 sngi halor ka phang “Hospital Preparedness for Health Emergencies for Hospital Administrators” hapoh ka jingpeit jong ka Disaster Management Cell, Ministry of Health & Family Welfare, Sorkar India, ha NEIGRIHMS Shillong naduh ka 16 haduh ka 21 tarik u Naiwieng, 2026.
Baroh ki la don haduh 38 ngut ki nongshim bynta na ki san tylli ki jylla ba kynthup naduh Manipur, Meghalaya, Mizoram, Nagaland bad Tripura kiba la ïoh ïa kane ka jinghikai, ong u Course Coordinator, Prof. Star Pala, Department of Community Medicine, NEIGRIHMS.
Ïa ki nongshim bynta la ai jinghikai lyngba ki bynta bapher bapher halor ka Disaster Management, kynthup ruh ïa ka jingwan jngoh ïa ar tylli ki hospital kiba ai jingsumar kyrpang ha ka nongbah, kata ka NEIGRIHMS bad ka Nazareth Hospital. Ki riew shemphang na ki tnat bapher bapher bad na ki bynta jong ka thaiñ ki la wan ban ai jinghikai ha kane ka prokram.
Ha ka prokram pynkut, u Prof. Nalin Mehta, Director, NEIGRIHMS, u la ai jingïaroh ïa ka jingtrei shitom jong baroh ki riew shemphang kiba la ai jinghikai, ha kaba u la ban jur ïa ka jingdonkam ba baroh ki administrator ki dei ban long kiba la pynkhreh bha na ka bynta ka Disaster Management, khnang ba lah ban pyllait im ïa ki mynsiem briew kiba kordor lyngba ka sienjam ha ka por kaba biang.
U la bynrap ruh ba ka jingpeit bniah bad ka jingsumar kaba dei ïa ki nongpang ha ki jingjia kyrkieh man la ka sngi ha ki hospital ka long ka jinghikai kaba bha tam ban pynkhreh ïa ki jingjia ha kaba don bun ngut ki nongpang kiba mynsaw. Kumta, u la kyntu ïa baroh ban pyrshang ban pynïaid ïa ki nongpang ba mynsaw bad kiwei pat ki jingjia kyrkieh da ka rukom kaba paka bad ha ka por kaba biang.
U Prof. Stephan Sailo, Medical Superintendent, u la ban jur ïa ka jingdonkam ban pynlong ïa ki jingpyrshang bad jinghikai man la ka por khnang ban lah ban pynïaid bha haba don ki jingjia ba shyrkhei.
Hadien kane, ki riew rangbah kiba la wan ïashim bynta ki la sam ïa ki Certificate sha ki nongshim bynta kiba la pyndep ïa kane ka jinghikai.
Na ka liang i Prof. Baridalyne Nongkynrih, HoD, Community Medicine, i la ai ïa ka jingkren ai khublei ha kaba pynkut ïa ka prokram.

Leave A Reply

Your email address will not be published.