Nongstoiñ, Rymphang, 24: Kum ka jingpyntreikam ïa ka jingbthah jong ka Election Commission of India, ha kaba ïadei bad ka 72 kynta shwa ka sngi thep vote haduh ka 2 tarik ba dei ka sngi niew vote, u District Magistrate ka West Khasi Hills u Bah Garod L.S.N Dykes IAS u la pyntip ba la pyntrei kam mardor ïa ka Section 144 CrPC naduh ka sngi 24 tarik haduh ka 2 tarik u Lber 2023, kaba long ka sngi niew vote.
Kane ka jingpynjari ka long ba la khang ïa ka jingrung jingmih mon jong ki kali riew shimet ne kali kamai, lait noh tang kito ki kali ba kit ïa ki nongtrei Election, ki nongthep vote bad ki kali kit marbam mardih, khamtam ha kito ki jaka kiba don markhap bad kiwei ki District ne bad ka jylla Meghalaya.
Ïa kane ka hukum la pyntreikam kum ka lad ban ïada ïoh don kano kano ka jingpyrshang ban pynthut ne pynklumar, khnang ban ïoh ïa ka Election kaba ïaid beit ïaid ryntih khlem kano kano ka jingthut.
