Sa shisien pynkhie im biang ka VPP ha madan Polo ïa ki nongkyrshan, poi da ki hajar ngut sha ka jingïalang

Shillong, Risaw 10: Ka madan Polo ha ka nohphai sngi jong ka sngi Saitjaiñ ka la dap hi smam da ki nongkyrshan jong ka seng Voice of the People Party (VPP) kaba la khot ïa ka jingïalang jong ki nongkyrshan jong ka kiba la poi da ki hajar ngut na ka bynta ka elekshon shiteng samoi sha Parliament na Shillong Parliamentary Constituency ban ai ka jingkit bok kit rwiang ïa u kyrtong ka seng u Dr. Batskhem Myrboh.
Ïa kane ka jingïalang la pynïaid da u CEM barim u Bah Shemborlang Rynjah, la pdiang sngewbha da u Dr. Londonel Sohtun ha ka jingdonlang u President Bah Ardent Miller Basaiawmoit, ki 17 ngut ki MDC KHADC, ki MDC na JHADC, ki lai ngut ki MLA bad ki dkhot ka executive committee ka VPP nalor ki hajar ngut ki nongkyrshan kiba la wan na ki shnong bapher bapher.
Ha kane ka jingïalang lah ban ong ba sa shisien na ka liang ki nongïalam ka Voice of the People Party ka la lah ban pynkhie im biang ïa ka mynsiem ieid jaitbynriew bad ïeid ïa ka synshar kaba khuid kaba suba khlem da don kano kano ka jingleh shilliang, namar bun ki la pynpaw ba ha kane ka por kaba mynta ka jylla ka la jot ka la pra ha kiba bun ki liang. Haba kren ha kane ka sngi u Dr. Batskhem Myrboh u la ai khublei ïa baroh kiba la wan ban kitbok, nangta u la pynkynmaw ïa ki matti ba ratbah u (Dr.) Ricky AJ Syngkon bad kumjuh ruh ban khot lang ruh ïa kito kiwei pat ki ba khlem kyrshan ïa ka VPP ba kin wan noh mynta ban kyrshan ïa kane ka party kaba long na ka bynta ka lawei jong ki khun ki kti.
Katba na ka liang u President u Bah Ardent Miller Basaiawmoit u la pynpaw ba ka party kan sa synshar hadien ka elekshon MLA ha u 2028 bad kan ïoh haduh 32 ngut ki MLA.
U la ïathuh ruh ïa ka khana shaphang ka jingseng ïa ka party bad ka jinglum lang ki katto katne ngut ki riew khraw pyrkhat ban ïada ïa ka jaitbynriew na kane ka saw ka sian kaba ha kane ka por kaba mynta ka jaitbynriew bad ka jylla ka la jot la pra.
U la ïathuh ba hadien ba u la shah rem noh kum u MLA ha u snem 2018 da 76 tylli ki vote u Bah Ardent u la mut ban sangeh noh na ka kam saiñ hima sima bad ba ki paidbah ka Nongkrem kin wad hi noh ïa la u jong u nongthaw aiñ.
“Hadien ba nga la rem nga la mut ban nym ïakhun shuh ïa ki elekshon hynrei ki don katto katne ngut ki riew rangbah kiba la wan ban khot biang ïa nga ba ngam dei ban sangeh noh naba dang donkam ban thaw bad pynkylla thymmai noh ïa ka ri da kaba khot da ka jingïalang kaba la pynlong ha Madan Student Jaïaw bad ha kane ka jingïalang la wan bun bah ki briew kiba kwah shisha ïa ka jingkylla, kumta nga la ïeng skhem biang ban bteng biang ïa ka kam ban shakri na ka bynta ka jingbha jong ka pateng ban wan bad ki khun ki kti,” ïathuh khana u Bah Ardent.
U Bah Ardent u la kob ruh ba u Dr. Batskhem un ïoh jingjop da kaba suk bad un ïoh ruh palat 8 lak tylli ki vote ha kane ka elekshon shiteng samoi.
Ha kane ka sngi na ka liang ki nongkyrshan ki la lum bad nohsynniang da ka pisa kaba la poi palat T. 3 lak 7 hajar tam ban kyrshan ïa u Dr. Batskhem ban pynlut ha kane ka elekshon bad ïa kane ka song pisa la aiti da u President Bah Ardent sha u Dr. Batskhem ha kaba na ka liang u kyrtong u la kular ban pyndonkam hok.
La ïoh ka jingrwai ieid ri ka Ri Khasi ri Khasi bad Khynriam u Pnar u Bhoi u War, ha kaba la shimbynta lang da ki paidbah. Ka la don ruh ka jingsngap jar ba shi minit kum ka dak ka jingkynmaw burom ïa u (L) Dr. Ricky AJ Syngkon, nangta ki jingai jingrwai nalor ka jingai ai sngewbha da ka VPP Youth Wing ia u kyrtong ka seng u Dr. Batskhem Myrboh da u Prah uba heh bha, nalor ki jingpynkup jaiñ ryndia.