Watla ngi leit sha ka jingïalang, ngin ïeng haba dei ban pyndam ne pynkynriah shawei ïa ka Ropeway Project: JAC

Shillong, Naiwieng 10: U MLA ka 19th South Shillong Constituency bad u Myntri ka Sorkar Jylla u Bah Sanbor Shullai u la khot ïa ki nongïalam jong ka Joint Action Committee Against Shillong Peak Ropeway Project ban ïakren bad ki ha ka 11 tarik ha ka por 4 baje janmiet ha State convention centre.
Ïa kane la ïathuh da ka Secretary ka JAC ka Dr. Linda Marbaniang haba kren sha ki lad pathai khubor ha ka sngi Baar.
Ka Secretary ha ka jingïakren ka la kren da kaba shai ba ka JAC kan ïeng ha ka nongrim ba ka Sorkar kadei ban pyndam beit ïa kane ka project bad kan ym pdiang ïa kiwei pat ki jingtyrwa.
Ka Secretary ka la ïathuh ruh ba mynta naduh ba la sdang ka jingshong kyllaiñ myngor kaba la ïaid artat la 5 Sngi ki la bun kiba la wan ai mynsiem, bad na ki nongmihkhmat kumba la kynmaw u MLA ka 17th North Shillong Constituency u Bah Adelbert Nongrum u la wan ai mynsiem.
Na ka liang ka President ka Kong Deborah Marbaniang ka la ïalam ruh ïa ka jingduwai bad don ruh napdeng kiba la wan ai mynsiem kiba la soi ki kyrteng jong ki.
Ka Secretary ka la ïathuh ruh kumba ka long mynta na ka liang ka Sorkar kam pat shym la pyni kino kino ki dak ban pynbeit ïa kane ka kam.
Shuh shuh halor kane, na ka liang ka Secretary ka la ïathuh ruh ba kane ka jingïakhih jong ki kadei naba ki sngewkhia ïa ki jaka ba don kum, ki tyllong um, ka jingpom ïa ki dieng bad ka la ong ba watla ki la ong ba kam ktah ïa u Lum Shyllong ne ba ka jingtei ka jngai na u Lum Shyllong hynrei na ka JAC ka ong beit ba kane ka jingtei kadei beit hapoh u Lum Shyllong kumta dei ban pyndam beit.
“Lada ka long ha kano kano ka rukom ruh ngin leit sha ka jingïalang bad ban ïeng beit ha ka nongrim ba ka sorkar kadei ban pyndam beit ne rah noh shawei ïa kane ka projek bad khamtam eh sha ki shnong kiba donkam shisha,” pynkut ka Dr. Linda Marbaniang ka Secretary jong ka JAC.