Pynlong mraw ka sorkar jylla ïa ki Sahep sorkar kathaduh 2 ne 3 District hap ban beh

Nongstoiñ, Naiwieng 10: Ka jingpep trei khah khah ki ophisar ha ki tnad ophis sorkar bapher bapher, ka la ktah shibun ïa ki paidbah kiba leit donkam ha ki ophis. Ym tang katta hynrei ka jingpep trei jong ki, ka wanrah ruh ïa ka jingpynduhnong bad ka pyndkoh ha ka rukom treikam, la ka long ïa ki paidbah ne ïa ki ophisar, namar kim lah shuh ban pyndep ïa la ka thong kaba la bthah da ki bor kiba halor.
Haba ïadei bad katei phang haba u nongthoh khubor u la pyrshang ban wad jingtip kaba kham bniah, la lap pynban ba ka jingshisha ka long namar ba u juh u ophisar u hap ban khmih ne peit haduh ar jaka ki ophis. Kane ka pynlong ba lada u don ha kawei station u hap ban pep noh shawei bad ki paidbah kim ïoh ban ïakynduh ha ka por kaba ki donkam. Kane ka ktah eh khamtam ïa kiba wan na ki shnong nongkyndong.
Kumban shu pyntip bad ban pynshisha ba ki don ki katto katne ngut ki ophisar kiba hap ban khmih haduh ar jaka, kum ka District Sport Officer West Khasi Hills District Nongstoiñ, ka dei kawei na ki ophisar kaba hap ban khmih lang ruh ïa ka Mairang, Eastern West Khasi Hills.
Ym tang katta hynrei dang don shibun kiwei pat ki ophisar kiba hap ban khmih lang ruh wat shaduh Mawkyrwat ne South West Khasi Hills District, kum na PHE bad kiwei kiwei, hynrei ym shym la ïoh ban ïakynduh ïa ki haba u nongthoh khubor u la pyrshang.
Nangta watla la plie Block kylleng ka District kum ha Rambrai bad Ri Muliang, hynrei u ba don ha Nongstoiñ Block u hap ban peit lut ïa baroh ki kam ki jam baroh, kumba imat u ïoh tulop ar lai tylli Block.
Ka jingkylli ka long hato kitei ki ophisar kin ïoh tang kawei ka tulop ne na baroh ar baroh lai District ?. Lada ka long na baroh, balei pat kam thung da uwei u briew, haba katne ki samla wad kam wad jam ki nang hiran, ne ka dei namar ba ka sorkar kam don pisa, lane katba don pisa set beit ban pynkhreh elekshon.
Lada kam don pisa balei pat la shu ai District thymmai, ai Civil sub division, ai Block bad kiwei kiwei man shuwa ka election. Hato kam long ka jingduhnong kaba khraw lada don tang ka ïing thymmai pynban kaba khongreng khlem ki jingdonkam ?
Ka jingshisha hi kumba ka paw ka sorkar ka shu pynbiej beit ïa ki paidbah ban plie ïa ki District ki Sub Division bad ki Block ha ki por ba la jan elekshon. Hynrei, ka jingplie ka shu long tang ban khroh paidbah katba ki kam ki long sah kumjuh. Ym tang katta hynrei ban pynïapeit khmat kumba long ïa ka Ri Muliang Block ha kaba laplie paidbah ha Nonglang, hynrei la pynkhreh ban tei building ha Tynghor.