Ba kynrei ki kam die kyiad be-aiñ, ïatreilang ka VDP bad ki Pulit ban rat dyngkhong

Mawkyrwat, Risaw 06: Ka Village Defence Party (VDP) jong ka shnong Jashiar, South West Khasi Hills District, da ka jingsngewkhia bad ka jingkitkhlieh ban ïada ïa ka bha ka miat jong ka shnong ka thaw, ka la pynkhlaiñ shuh shuh ïa ki jingïatreikam ban ïakhun pyrshah ïa ki kam die kyiad be-aiñ bad kiwei pat ki jingdih pynbuaid kiba la ktah jur ïa ka imlang sahlang.
Ym tangkata, ka jingjyllei jong kine ki kam ka la wanrah ïa ka jingsngewsyier bad pynkharoi ïa ki jingsniew ha ki longïing longsem, ki shnong ki thaw bad ka imlang sahlang hi baroh kawei, kaba ktah ruh khamtam ïa ki khun samla.
Namarkata, na ka bynta kane, ka Village Defence Party (VDP) jong ka shnong Jashiar ka dang ïai trei shitom ban rat dyngkhong ïa kum kine ki kam be-aiñ, kumjuh ruh ban ïada ïa ki jingdon jingem bad ïa ki um ki wah na ki kam pynjulor bad ki jingleh dusmon jong ki riew khwan myntoi shimet, khnang ban wanrah biang ïa ka imlang sahlang kaba suk, ba shngaiñ bad ba khuid ha baroh ki liang.
Shuh shuh kum ka dak jong ka jingïasyllok bad ïa phylliew jingmut kumno ban pynkhlaiñ bad ban rad dyngkhong ïa ki jingsniew, ki la pynlong de ïa ka jingïalang ha Ïing Dorbar Hall Shnong Jashiar, bad ban pynskhem ruh ïa ki dkhot jong ka Village Defence Party (VDP) jong ka shnong Jashiar.
Ha kane ka jingïalang la donlang u Bah J. Lakiang, Officer-in-Charge jong ka Mawkyrwat Police Station, uba la ai ïa ki jingkren bad pynskhem ruh ïa ki dkhot ka Village Defence Party (VDP) jong ka shnong Jashiar. Hadien kane, la ai jingkren ruh da u Bah B. Kharjana, Additional Superintendent of Police, bad u Bah Robert Lyngdoh, Myntri Shnong Jashiar ha ryngkat ka jingïadonlang ruh ki dkhot ka VDP na Nongbah-Marshilong bad na ka shnong Mawthawiang-Nongtraw.
Ha ka jingkren jong u, u Bah B. Kharjana, Additional SP, u la ai mynsiem ïa ki dkhot ka VDP ba wat hapdeng ki jingeh ba ki ki ïa kynduh ha ka ban wanrah ïa ka jingbha ha ka imlang ka sahlang, kim dei ban kynran dien hynrei kin nang trei shitom bad ïatreilang ban rat dyngkhong ïa kine ki kam be-aiñ. U la pynpaw ruh ba ki Pulit kin long kiba kloi ban ai jingïarap bad jingïatreilang bad ka VDP ha kano kano ka por lada ki donkam, bad u kyntu ïa ki dkhot ba kin nang trei hok bad trei shitom ha ka kamram ba la bynshet ha ki.
Ha kajuh ka por, u la ai ruh ka jingïaroh ïa ki dkhot ka VDP, khamtam ïa ki longkmie kiba la pyni ïa ka jingshlur ban mih shakhmat bad ïatreilang ban wanrah ïa ka shongsuk shongsaiñ ha ki shnong ki thaw, da kaba ïakhun pyrshah ïa kino kino ki kam kiba long pyrshah ïa ka shongsuk shongsaiñ bad ka bha ka miat jong ka imlang sahlang.
Ha kajuh ka sngi, la pynlong ruh ïa ka jingtheh bad bret noh ïa ka kyiad pyrsi, kaba long ka dak jong ka jingkut jingmut ban ïakhun pyrshah ïa ka jingdie bad jingpyndonkam ïa ki jingdih pynbuaid be-aiñ.
Ïa ka prokram la pynïaid da u Bah M. Thyrniang, bad ïa ka jingkhublei la ai da ka Kong S. Mawlong, President ka VDP jong ka shnong Jashiar.