Kiew ka bill khlem pyndonkam, ujor ka BJP Ri-Bhoi sha ka MePGCL bad DC ka Ri-Bhoi, dawa peit jingeh ki paidbah

Nongpoh, Risaw 06: Namar ka jingthud kaba la palat ka bording ha Ri-Bhoi District, kaba la pynsyrtong shikatdei ïaki paidbah naduh ki kam ki jam, ki khynnah skul kiba hap ban minot bad pynkhreh ïaki eksamin bapher bapher bad kiwei kiwei ki jingdonkam ba man ka sngi, ka BJP Ri-Bhoi District mynta ka sngi kala pynher syndon da ka jingthoh sha u Superintending Engineer ka Meghalaya Power Generation Corporation Limited (MePGCL) ha Umiam bad ruh sha u Deputy Commissioner ka Ri-Bhoi District ba dei ban shimkhia mardor haba ïadei bad ka bording bad ruh ka jingkiew ka bai bording watla ki paidbah bun ba kim ioh pyndonkam satia ïaka bording.
Haba kren sha ki lad pathai khubor, naka liang u Bah Sen Thabah President ka BJP Ri-Bhoi bad u Bah Bandari Ryntathiang President ka BJP Umroi Mandal haka jingdonlang u Bah Teibor Nongshli President ka Umsning Mandal, u Bah Albertus Lapang President ka Jirang Mandal bad kiwei kila ong ba bun naki paidbah kila ujor haba ïadei bad ka thud ka bording khah khah bad kum ka party ka dap da ka jingsngewkhia bad lei buh syndon da ka jingthoh sha u SE ka MePGCL namar ka jingkiew jong ka bai bording kala long shaba palat katba ki paidbah kim ioh satia ban pyndonkam ïaka bording.
Ki la ong ruh ba ka bording ka mih na Ri-Bhoi hynrei dei ki nong Ri Bhoi kiba mad jingeh shaba palat haba ïadei bad ka bording elektrik, kaba ktah shikatdei ïaki khynnah skul, ki samla pule, ki nongseng kam seng jam bad shibun ki kam ki jam kiba hap ban pyndep bad pyndonkam da ka bording bad kum ka tnad bad ki bor ba dei peit ki dei ban shimkhia mardor haba ïadei bad kane ka jingeh, bad khamtam ka jingkiew palat ka bai bording khlem da ioh pyndonkam.
Haba ïadei bad kane ka mat lada kam don kano kano ka jingshimkhia, naka liang ka BJP kam banse ban mih paidbah ryngkat ki placard bad pynlong da ka rally ban dawa naki bor ba dei peit ba ki dei ban shimkhia mardor haba ïadei bad ka jingeh kaba ki paidbah ki mad naka jingbym biang ka bording elektrik ha ka them Ri-Bhoi baroh kawei.