Mawkyrwat, Risaw 07 : Hadien ka jingïoh jingujor na ki paidbah ka dong ka thaiñ shaphang ka jingbym biang ki jingdonkam bad ki jingduna kiba bun ha kaba ïa dei bad ka jingai jingshakri ha ka liang ka koit ka khiah na ka bynta ki paidbah, na ka liang ka Khasi Students’ Union (KSU) Umdohlun Circle bad KSU Warsanlyngdoh Circle mynta ka sngi ki la hiar jurip ïa ka Wahkaji Primary Health Centre (PHC) kaba don ha shnong Wahkaji.
Ïa kane ka jingjurip la ïalam da u samla Donbor Marshra, President, KSU Warsan Lyngdoh Circle, ryngkat bad u samla Drepstarwell Thongni, Vice President, KSU Umdohlun Circle.
Ha kane ka jingïajurip, ka KSU ka la ïoh ruh ban ïakren markhmat bad ki doktor kiba trei ha kane ka PHC, ha kaba ki la pynsngew ïa ki jingeh bad jingduna bapher bapher kiba donkam ban pynbeit bad pynbiang, khnang ban lah ban pynkhlaiñ ïa ki jingshakri ha ka liang ka koit ka khiah na ka bynta ki paidbah.
Ki jingduna ba ki la pynsngew ki kynthup naduh ka jingdon briew kiba dei kum ki nongtrei kata Pharmacist, Grade – IV – 2, UDA/Accountant/DEO, Laboratory Assistant. Nangta, ka jingker sawdong (Fencing) ïa ka PHC, ki jaka leit shabar, ka bording elektrik, khamtam ka jingeh kaba ïadei bad High Voltage, ki kamra ban shong ki nongwan shim dawai, ka jaka shnong kum ki conference Room, ka kamra AYUSH OPD, ka jaka buh tiar ne Store Room, ki jaka sah ne quarters na ka bynta ki nongtrei, kiba dang duna bad ka X-ray.
Kumta, ka seng ka la kyrpad ba ha kaba ïadei bad kine ki jingduna, ka Sorkar Meghalaya, lyngba u Myntri ba dei khmih ïa ka tnat ka Koit ka Khiah, u la dei ban shimkhia mardor ïa kane ka mat bad ban pynbiang ïa ki jingdonkam katkum ka jingdonkam jong ka PHC Wahkaji.
Ym tangkata, ka seng ka kyntu ruh ïa u MLA jong ka thaiñ, u Bah Pius Marweiñ, ba un shimkhia lem halor kane ka bynta, namar ki paidbah jong ka thaiñ Warsanlyngdoh bad Phlangdiloiñ ki la ju ïakynduh bad mad ki jingeh man ka por haba ki pang ki shitom, namar ka jingduna jong ki jingdonkam bad ki jingshakri ha kane ka jaka ai jingsumar.
Ka seng ka la pynpaw ba namar ka jingduna jong ki jingdonkam ha PHC Wahkaji, ki paidbah jong kane ka thaiñ ki ju hap ban leit wad jingsumar sha Nongstoiñ, Mawkyrwat bad Shillong, kaba la pynkhia shuh shuh ïa ki paidbah, khamtam ïa kito kiba donkam ïa ka jingsumar kaba kyrkieh.
Namarkata, ka KSU ka kyrmen ba ki bor ba dei khmih kin shimkhia ïa kine ki jingeh kiba la pynsngew da ki paidbah bad ban shim ïa ki sienjam kiba donkam ban pynbha bad pynkhlaiñ ïa ki jingshakri jong ka PHC Wahkaji, khnang ba ki paidbah jong ka thaiñ kin ïoh ïa ki jingshakri ka koit ka khiah kiba biang bad janai.
