Kyntait ka VPP ban ïathuh shaphang u samla uba pyntip halor ka jingshah pan pisa ïohkam

Nongstoiñ, Risaw 07: Hadien ka jingthung ïa ka kynhun tohkit lane komiti ban khmih bniah halor ki jingkynnoh ba ka don ka jingbamsap kaba jur ha kaba ïa dei bad ka thungkam staff nurse ha Maternal Child Health Hospital Nongstoiñ, na ka liang ka komiti ha ka sngi balang 7 tarik Risaw 2026, ka la khot hajir ïa ki ar ngut ki nongkitkam ba hakhmat kata ïa u President bad Secretary jong ka VPP State Youth Wing ha ophis treikam jong ka Deputy Commissioner West Khasi Hills.
Kine ki nongïalam ki kynthup ïa u Bah Marbud Dkhar u ba long u President bad u Bah Nathaniel Mawrie General Secretary, ha kaba ki la poi sha DC ophis, ban ai ïa ka jubab ka jong ki.
Haba kren pat sha ki lad pathai khubor hadien ba ki la mih na DC ophis, u Bah Marbud Dkhar President ka VPP State Youth Wing u la ong ba ka long ka jinglyngngoh ba kiba khot hajir ïa u, ki la kylli pynban ïa ka kyrteng jong u samla u ba la pyntip shaphang ka jingdon ka jingpynbam pisa ban ïoh kam.
U Bah Marbud u la ong ba u khlem ai satia ïa ka jingtip shaphang u samla, namar kam shngaiñ bad ong ruh ba u samla u ba ai jingtip, u la ai kyrteng ïa ki ar ngut ki briew kiba donkti ha kane ka kam. Hynrei ïa kine pat kiba la dep ban paw kyrteng ym pat khot hajir haduh mynta.
“Ngi la ïoh ïa ka shithi shah khot ban ai jingtip halor ka kam staff nurse ha MCH Nongstoiñ. La dep ban khot ïa nga bad u general secretary uwei hadien uwei pat naduh ka por 12:30 shiteng sngi. Ka long ruh kaba lyngngoh ba na ka liang u SP bad u ADC ki la kylli bad pan pynban ïa ka kyrteng jong uto u khynnah”, ong u Bah Marbud.
U la ong ruh, “U to u khynnah u mih shakhmat bad da ka jingshaniah u ai jingtip sha ka VPP State Youth Wing, da kaba ong ba u kwah ban pyntip ba ka don ka jyrsieh jong ka rukom thung kam staff nurse ha MCH Nongstoiñ. U da pynmih ruh ïa ka kyrteng jong ki ar ngut ba ki donkti ha kaba dawa pisa ne pan pisa na ki khynnah kiba aplai ïa ka kam staff nurse”.
“Kumta na ka liang jong nga ruh nga hap kylli kylla na u SP bad na u ADC ba hato ki lah khot ne em ïa kine ki ar ngut kiba la paw ba ki suba donkti ha ka kam bam sap. Ka jubab ka long ba ym shym pat khot satia wat haba ki la paw kyrteng shabar, hynrei ïa ngi pat khot hato don aiu shalyndet jong kane ka kam. Na ka liang jong nga ruh haba ki kwah tad jingmut ïa une u samla u ba pyntip sha ka VPP, ki la pan ïa ka kyrteng bad jaka sah jong u”.
“Hynrei haba shai hakhmat jong ki nga la ong ba na ka liang ka VPP ngin ym lah ban ai. Ngi dawa ba dei ban ai shwa ïa ka jingpynthikna lyngba ka jingthoh ba kan don ka jingïada ïa u samla u ba la ai jingtip sha ngi. Namar na ka liang jong ngi ngim lah ban shaniah ïa kane ka bor sorkar khamtam haba ngi dang ïakhun ïa kane ka jinglong bamsap jong ka sorkar. Kumta kumno ngin sei ïa kita ki kyrteng bad haba ki paidbah ki shanïah ïa ka VPP hato ngin shet kylla noh ïa ki paidbah ?”, ong u Bah Marbud.
Shuh shuh u la ong ruh, “Haba ki pan ïa kita ki jingpynshisha lane ki sakhi satar, ngi la ong ruh ba ki dei ban weng noh shwa ïa ka jingujor ejahar da u MLA jong ka Nongstoiñ pyrshah ïa u samla ba ai jingtip ïa ngi. Ngi sngewthuh shai ruh ba ka ejahar ba la ai da u MLA Nongstoiñ ka long beit ban pyntieng pynsangeh ïa ki khun samla jong ngi khamtam na West Khasi Hills, kiba la sdang ban nang mih ban pyntip sha ngi ka VPP, ïa kaba kane ka jingthung kam da kaba bam sap kam jia tang ha staff nursing jong ka MCH, hynrei ha ka DSC hi ruh”.
“Na ka liang jong ngi hi kane ka dei ka sien ba khatduh ba ngin wan ban hajir hangne, namar ba ka rukom kylli jingkylli ïa ngi ka long kumba tohkit na ki nongleh kam sniew bad ka jingsngewthuh jong ngi ka long beit ba ki kwah ïa uto u samla u ba la phla. Hynrei na ka liang jong ngi ïa u nongai jingtip lane u whistle blower ngim lah ban ai jingtip”.
“Ngi kyntu ruh sha baroh ki samla jong ka West Khasi Hills ba kumba ki long shisha ki samla kiba shlur ban mih shakhmat, na ka bynta ban ïakhun pyrshah ïa ka bam sap, ba ki dei ban mih shakhmat bad ai jingtip sha ka VPP”.
“Na ka liang jong ngi hi ngi kren shai ba lada ngin sei noh ïa ki kyrteng jong ki samla kiba kwah ban pynkhuid ïa ka bamsap bad ka thok ka shukor, hato ki paidbah kin kren kumno ïa ngi bad ïa ka VPP. Haba u paidbah u dang shaniah ïa ngi bad ngi pat ngi shet kylla kamut ka la kut yn ïa kren ïa kaei shuh”, ong u Bah Marbud.