Pan map u SE PHE ba thung kam khlem nongrim, yn weng noh hadien ka Elekshon

Nongstoiñ, Rymphang 24: Haba jubab ïa ka jingpan jingshai jong u Deputy Commissioner ka West Khasi Hills, halor ka jingthung kam sop sop khlem pynbna ne khot interview, ïa kaba la jia hadien ka jingleit tynruh da ka seng KSU, u Superintending Engineer ka tnad PHE u la pan map ïa ka jingthung kam hapoh ka tnad kaba la long khlem ki nongrim ba biang.
Ha kajuh ka por na ka liang u SE u la kren shai ha ka jingjubab jong u sha u Deputy Commissioner, ba un weng kam lut ïa kitei kiba la shu thung beaiñ bad ban jur ruh halor ka jingpan map ïa ka jingleh bakla.
Lah ban pynkynmaw ba na ka liang ka seng KSU West Khasi Hills ka la lap ïa ka jingthung kam sop sop ha ki ar tylli ki department khlem khot interview kata ha (SE) PHE bad ka Office DMHO. Hynrei, ha kaba ïa dei bad ka tnad DMHO, la ïoh jubab ba la leh ïa ka jingthung kam thung jam sop sop da ki bor ba halor jong kane ka tnad kaba don ha Shillong.
Ka seng ka la lap ba kitei ar tylli ki tnad sorkar ki la pynrung kam khlem jingtip jong u Deputy Commissioner kum u chairman jong ka selection committee. Kitei ki ar tylli ki department ki la ïaid lait khlem khot interview haduh 19 tylli ki post ba lah sanction katkum ka jinglap jong ka seng.
Halor kane ka bynta na ka liang ka seng ka pynpaw ka jingbitar, namar katei ka jingleh jong kitei ki Officer jong kitei ki ar tylli ki department, ka la pynduh jingkyrmen ïa ki samla wad kam wad jam ha West Khasi Hills.
Na ka liang ka seng lyngba u President rangbah Bah John Fisher Nongsiang, ka dawa ïa u DC ba u dei ban weng kam ïa kitei ki briew kiba la thung kam ha kitei ki office bad dei ban khot interview thymmai. Nalor nangta dei ban pynshitom ïa baroh ki ophisar bad ki briew ba donkti ban thung kam tuh. Lada na ka liang u DC bad kitei ki tnad kim patiaw halor kane, na ka liang ka seng kan sa leh ïa kaba donkam.
Ha kajuh ka por u la pynpaw ruh ba shen ka seng kan sa leit tynruh sha ka tnad DMHO ban jubab balei ka shu thungkam khlem da ïaid da ki lynti kiba dei, na ka bynta ka jingthungkam kaba shong nongrim bad kaba ai jinghun sha ki paidbah baroh.
Katkum ki khubor, ka jingthungkam sop sop ïa kaba la ngeit ba la leh donbor da ki ‘lei san snem, ka jur bha ym tang ha ophis DMHO lane ha SE (PHE). Hynrei ha kiwei kiwei ruh khamtam kum ha ka Nongstoiñ C&RD Block bad kiwei kiwei.