Pan jingkyrshan ka Mahua Moitra na ki paidbah ka Mawkyrwat ban pynjop ïa u Bah Sounder S. Cajee

Mawkyrwat, Rymphang, 24: Ka Mahua Moitra kaba dei ka Member of Parliament hapoh ka 17th Lok Sabha na Krishnanagar, Nadia District, West Bengal na ka Trinamool Congress mynta ka sngi ka la wan ban ïuh kjat ha Mawkyrwat Constituency ban wan ban ai jingkyrshan bad ïalap elekshon na ka bynta u bah Sounder Strong Cajee u kyrtong na ka All Meghalaya Trinamool Congress Party (AMTC) u ban sa mih madan ha kane ka MLA Election 2023.
Haba ai jingkren ha ka jingïalang, ka Mahua Mitra ka la pynpaw ka jingsngewnguh ïa ki paidbah jong ka Mawkyrwat Constituency kiba la poi lang ha kane ka jingïalang an pynshit pynshngaiñ ïa kane ka sngi bad ha kajuh ka por ka la ong ruh ba naduh ba ka ïa kynduh ïa u bah Sounder Strong Cajee ka ïohi ïa ka jingskhem jong u ban shisha long uta u nongïalam jong ki paidbah lyngba ka All Meghalaya Trinamool Congress Party (AMTC) ha kane ka MLA Election jong u snem 2023 na kane ka 36-Mawkyrwat Constituency.
Ha kajuh ka por ka la ïathuh ba ka Trinamool Congress Party ka dei ka party na West Bengal bad balei pat ka wan hangne hapoh Meghalaya bad ka la ïathuh ba namar ka dei na National Party ha kaba ka Mamata Banerjee ka Myntri Rangbah hapoh West Bengal kaba la pyni ïa ka jingshlur ban don ka jingïaleh pyrshah ïa ka BJP.
Ha kawei pat ka bynta, ka la pynkynmaw ruh ba u Amit Shah uba dei u Home Minister haba u wan hangne ha Meghalaya u ong ba kane ka sorkar MDA hapoh jong ka jingïalam ka NPP ka dei ka sorkar kaba bam sap hynrei u klet pat ha kane ka sorkar ka don lang de ka BJP bad kiwei de ki party kiba don kti lang ha kane ka bynta. Namarkata, ka la ïathuh ba ha kane ka kynti, ka BJP bad ka NPP ki la sdang ban kynthoh para ma ki, pynban kane ka jingïakynthoh ka dei tang ka jingïalehkai drama ne ka jingpynbieit ha ki paidbah. “Ka jingïakynthoh mar kylliang ka BJP bad ka NPP ki long tang ki jingthok ïa u paidbah bad kine ki long ha ka juh ka jingtreikam, kine ki la shu pynbieit ha ki san snem, namarkata, wat long bieit shuh ha kane ka elekshon ba mynta”, ong ka Mahua Mitra.
Ka Mahua Mitra ka la ong ruh ba ka NPP bad ka BJP ki nang mut ba ki nong Meghalaya ki long kiba bieit hynrei ai ba ha kane ka kynti ba mynta kum ki paidbah kim dei shuh ban shah kynnoh ba ki long ha kata ka bynta, namar la sakhi ba ha ka jingsynshar jong ka sorkar MDA hapoh ka jingïalam jong ka NPP ym shym la don ki lad pynroi khamtam eh ka jingpynbha ïa ka surok na Shillong sha Mawkyrwat bad ka kongsan lei lei ïa kata ka surok bah ne ka Two Lane kaba ki paidbah ki la ap khmih lynti la slem bah, bad ha kane ka jingsynshar jong ka sorkar MDA ruh shibun bah ki kam pynroi ym shym la lah ban leh ha ka rukom kaba dei la ka long ha ki lynti ki synkien, ki jaka pule, ki jaka sumar bad kiwei de ki jingmyntoi jong u paidbah.
Kumta ka Mahua Mitra ka la ong ba kum ki paidbah nongshong shnong ki lah ban pynkylla ïa ka jingsynshar jong ka sorkar MDA hapoh ka jingïalam jong ka NPP bad kiwei de ki seng saiñhima tang da ka bor jong u ‘ti-kmie jong ki da kaba kin leit thep ïa ki vote ha ki polling station ha ka 27 tarik u Rymphang, 2023 da kaba ñion ha ka party TMC ha ki ar tylli ki syntiew.
Haba pynpaw ïa ki katto katne ki jingtreikam jong ka AITC, ka Mahua Mitra ka la ong ba dei tang kane ka party kaba nud ban ïeng ïaleh pyrshah ïa ka BJP hapoh jong ka Ri India bad ka namar ka Indian National Congress (INC) ka la duh bor noh ban ïeng ïaleh ïa ka BJP ha kine ki snem kiba la dep. Ka la pynkynmaw ruh ba ha u snem 2006 ka Indian National Congress (INC) ka don haduh 16 ngut ki Myntri Rangbah hynrei mynta pat ki don sa tang ar ngut bad kine ruh ki la sdang duh bor noh.
Ka AITC lyngba ka jingkren jong ka hapoh parliament, ka la nud ban kren ba dei ban pynrung ne ithuh noh ïa ka ktien Khasi bad Garo hapoh jong ka khyrnit kaba 8 jong ka riti synshar jong ka Ri India bad da kaba buh ruh ka jingkylli ba balei ka BJP kam lah ban pynurlong ïa kane watla ka la don ka jingpynsngew. Namarkata, ka la pynsngew ba ka AITC ka don ruh ka thong ban ïakhun ïa kane ka bynta tat haduh ban da ïoh ïa ka na ka bynta ka jingmyntoi ki paidbah jong ka Jylla Meghalaya baroh kawei.
Kumta ka kyntu ruh ïa ki paidbah ba kim dei shaniah ïa ka BJP namar bad ka RSS ki don ka jingthmu ban pynduh ne weng ïa ki khristan, bad ka jingithuh ïa ki Schedule Tribe, Schedule Case bad ki thmu ruh ban don beit tang kawei ka niam, kawei ka ktien bad ki kwah ban ïa ngi ba ngin bam jhur ym da ka doh. Kumta ka AITC ka la kular ba halor kane ka bynta kan nym shongthait hynrei ka don ïa ka jingthmu ban ïakhun ïa kane ka mat khnang ba ki paidbah kin nym mad ïa ki jingeh.
Ka Mahua Moitra ka la ïathuh ba dei tang ha Mamata Banerjee ka Myntri Rangbah kaba dei ka riew kynthei kaba don ha ka ïa ka mynsiem ïaleh bad khlem jingtieng hynrei ka don beit ïa ka thong ban ïeng ïaleh bad pyrshah ïa ki kam bym ïahap bad ki paidbah bad kaba don ruh ka jingïohi jngai ban ïarap ïa ki briew kiba duk kiba suk bad kiba shem ha ki jingeh.
Ha kaba pynkut ïa ka jingkren ka Mahua Moitra ka la buh ïa ka thong ba ka surok bah na Shillong sha Mawkyrwat ka dei ka mat ba hakhmat eh jong ka AITC ban pynurlong lada ki paidbah kin pynjop ïa u bah Sounder Strong Cajee.
Ha kane ka sngi ka la don ruh ka jingpdiang burom ïa ki briew kiba dang wan rung thymmai ha kane ka All Meghalaya Trinamool Congress Party (AMTC) hapoh Mawkyrwat Constituency ha kaba ïa ki la pdiang sngewbha da u bah Sounder Strong Cajee ryngkat ka jingpyndeng da ka jaiñ kaba don ïa ka dur jong ka party TMC bad uba la ai ruh ki jingkren ha kane ka sngi.
Ïa ka jingïalang ha kane ka sngi la pynïaid da ka kong P. Marweiñ, Chief Organiser ka MSCEPAC, ka jingkren pdiang na u bah Remdor Shylla, General Secretary ka All Meghalaya Trinamool Congress Party (AMTC) Mawkyrwat bad kumjuh la ïoh ïa ki jingrwai bad ki jingshad na ki samla kynthei bad shynrang.