Lap shibun ki jingduna ha ka jingleit jurip ka HYC ïa ka Thiepdiengngan Deficit LP School

Mawkyrwat, Risaw 28 : Ka Hynñiewtrep Youths Council (HYC) jong ka Keniong bad Thiepdingngan Unit, ha ka sngi ba ar jong ka taïew ka la leit ban jurip ïa ka Thiepdiengngan Deficit Lower Primary School, kaba don ha ka shnong Thiepdiengngan – Keniong, hapoh ka Ranikor C&RD Block, Ranikor Constituency, South West Khasi Hills District.
Kane ka jingleit jurip jong ki ka long hadien ba ka seng ka la ïohsngew ïa ki jingujor bad jingud jong ki nongshong shnong halor ki jingduna ha kiba bun ki bynta kiba ktah ïa ka rukom treikam bad ka pule puthi ha ka Thiepdiengngan Deficit Lower Primary School.
Ka seng hapoh ka jingïalam jong u Education Secretary jong ka HYC Keniong bad Thiepdingan Unit, u bah Brigadier Sanglyne ka la pynpaw ba kumba ka seng kaba don ka jingkitkhlieh ban peit ïa ka bha ka miat jong ki paidbah hapoh ka shnong ka thaw, kam lah ban shu sngap jar ne shongkli kti haba ki paidbah ki pynpaw ïa ki jingeh kiba ki mad. Kumta, ka seng ka la shim ïa ka rai ban leit jurip bad peit hi da la ki jong ki khmat ïa ka jinglong jingman jong kane ka skul.
Hadien ka jingjurip, ka seng ka la lap ba kane ka skul ka dang don shibun ki jingduna, khamtam ha kaba ïadei bad ki kamra klas bad ka jingbym don ka jingtei kaba biang. Ka skul ka don tang kawei ka kamra klas bad kawei ka kamra ophis, hynrei namar ka jingduna jong ki kamra klas, la hap ban pyndonkam noh ïa ka kamra ophis kum kawei pat ka kamra klas. Kane ka skul ka ai jinghikai ïa ki khynnah naduh ka klas I haduh ka klas V, bad ki don kumba 50 ngut ei ei ki khynnah pule.
Kawei pat ka jingeh kaba khraw eh ka long ka jingduna nonghikai, ha kaba tang iwei i nonghikai i la hap ban shim ïa ka jingkitkhlieh ban hikai ïa baroh ki klas. Kane ka wanrah ïa shibun ki jingeh ha ka jingpynïaid ïa ki kam jong ka pule puthi, namar ba i hap ban pyndep ïa ki kam hikai jong baroh ki klas bad ruh ban pyndep ïa ki kam ophis bad kiwei ki kam kiba ïadei bad ka skul, kynthup ïa ki kam kiba hap ban leh lyngba ka online.
Ha kawei pat ka bynta, katkum ka jingtip ba la ïohlum na u bah Bestparland Thongni, Secretary jong ka Managing Committee jong kane ka skul, la ong ba mynshwa kane ka skul ka don ar ngut ki nonghikai. Hynrei, hadien ba iwei na ki nonghikai i la shongthait noh ha u bnai ‘Naitung 2025, ka post kaba lait bad ym pat shym la pyndap haduh mynta, watla la jan dap shisnem shiteng naduh ba la thylli ka post.
U la ïathuh ruh ba ïa ka written test na ka bynta kane ka post la dep pynlong ha u bnai Jylliew 2026, bad kaba sah ka long tang ka personal interview. Hynrei, haduh mynta ym pat shym la pynlong ïa kane ka interview, bad ka daw jong kane ka jingslem kam pat shai.
Namarkata, na ka liang jong ka seng, ka la pynpaw ba kan sa leit ban ïakynduh ïa u Sub-District School Education Officer (SDSEO) jong ka South West Khasi Hills District ban pan jingpynshai halor ka daw jong ka jingslem ban pynlong ïa ka personal interview bad ban pyndap noh ïa ka post kaba dang lait.
Ban shu kdew ba kane ka skul la seng ïa ka ha u snem 1983, bad mynta ka la kynjoh sha ka 43 snem naduh ba la seng ïa ka bad ka dei kawei na ki skul ba la rim ha ka shnong Thiepdiengngan – Keniong bad ha ki por ba la leit noh ka la noh synñiang shibun ha ka ban ai jingnang jingstad ïa ki khynnah jong ka shnong.
“Hynrei, ha kine ki por mynta, ka jingwan ban pule jong ki khynnah ka la nang duna”, ong u bah Brigadier Sanglyne, Education Secretary jong ka HYC Keniong bad Thiepdingan Unit namar na ki daw ba bun ki kmie ki kpa ki la pynkynriah noh ïa la ki khun sha kiwei pat ki skul namar ka jingbym biang ki kamra klas bad ka jingduna nonghikai ha kane ka skul.
Kumta halor kane ka bynta, ka HYC Keniong bad Thiepdingan Unit, ka la kyntu jur ïa ka Sorkar Jylla bad ïa u MLA ka Ranikor Constituency, u Bah Pius Marweiñ, ba kin phai khmat lem sha kane ka skul da kaba pynbiang ïa ka jingtei bad ki kamra klas kiba biang, khnang ban pynsuk ïa ki khynnah pule bad ki nonghikai ha ka ban pyndep ïa ki kam pule puthi.
Ha kajuh ka por, ka seng ka la kyntu ïa ka Sorkar ba kan shimkhia ban pyndap noh kloi ïa ka post nonghikai kaba dang lait thylli, khnang ba ki khynnah kin ïoh ïa ka jinghikai kaba biang bad ba ka lawei jong ki kan long kaba phyrnai.
Kiwei de kiba la donlang ki long u General Secretary jong ka HYC Keniong bad Thiepdingan Unit, u bah Jewelstone Thongni bad para dkhot jong ka HYC Keniong bad Thiepdingan kiba la synran ha kane ka jingleit jurip.