Ba sahdien palat ka shnong Mowjem pynshna tyllong umbam ka KJUPRF, duna ki kam pynroi

Jowai, Risaw 28: Ka Khasi Jaiñtia United People Right’s Forum (KJUPRF) mynta ka sngi 28 tarik u Risaw, 2026 kala hiar ban jurip ïaka Shnong Mowjem kaba don ha West Jaiñtia Hills District, ha kaba ka Seng kala lap ba ka Shnong Mowjem ka dang sahdien bha shaba palat khlem ki kam pynroi (Zero Development) kata naduh ki surok, jaka sumer, ki skul, umbam umdih, Jobcard, ka light, Scheme ïing, Scheme painkhana nalor kiwei de.
Na ka liang ka seng wat hapdeng ka jingsniew palat jong ka surok bad jngai ka lynti kala leit ban ai jingïarap ïa katei ka shnong da kaba pynpoi ïa ki tiar naduh ka dewbilat, ki nar rot, ki mawit bad kiwei de ki jingdonkam ban pynshan ïa kawei ka tyllong Umbam Umdih haka Shnong Mowjem.
Shuh shuh ka seng kala pynsngew baka Shnong Mowjem ka long ka Shnong kaba la slem bha daki spah snem hynrei ka Shnong Mowjem ka long kaba sahdien bha ha baroh ki liang, da kaba kynthoh ka Shnong Mowjem ka dei ka Shnong ba don hapoh Ri India ym dei ba don ha Bangladesh, lane China baroh ki Nongshong Shnong jong ka Shnong Mowjem ki dei ki nong India bad ki don ka hok ban ïoh ïaka Central Scheme kum ba ïoh lang kiwei ki Nongshong Shnong jong ka Ri India.
Ka seng kan ïaleh shitom ban pynïoh ïaka hok jong ki Nongshong Shnong ka Mowjem kiba dei hok ban ïoh naka sorkar kmie. Halor kane ka seng shen kan sa phah da ka jingthoh sha u myntri rangbah duh ka ri halor kane ka jinglong jingman jong ka shnong khlem don ki kam pynroi satia.
Ha kane ka jingleit jngoh na ka liang ki nongïalam ka seng ki kynthup ïa u President Central Body Regeenal Shylla, President ka West Jaiñtia Hills District u Rihii Lyngdoh, General Secretary West Jaiñtia Hills u Edelson Dkhar, Heinidao Dkhar Sport Secretary, Dalammiki Nongrum – Organising Secretary bad Executive Member u Shainning Dkhar.