500 tylli ki kam kin mih ynda ladep shna ïa ka Ropeway ha Riat Laban: Paul

Shillong, Naiwieng 05: Ka sorkar jylla ha ka sngi Palei ka la pynthikna ba katkum ka jingïasoi soskular ban pyntrei ne shna ïa ka Ropeway Project ha Riat Laban ka sorkar ka la kular ba kan ai kam shwa ïa ki trai jylla bad kaba nyngkong eh kan dei ïa kito kiba sah sha katei ka thaiñ.
Ïa kane la kren shai da u Myntri ka tnat Jngohkai u Bah Paul Lyngdoh ha ka sngi Palei haba kren sha ki lad pathai khubor.
U Bah Paul u la ong ba ka jingai kam ïa ki trai jylla kan long beit katkum ka Industrial Policy jong ka sorkar jylla ha kaba la buh ba ynda la dep ban shna ïa ka Ropeway Project ki ban ïoh kam hi kin dei shwa da ki trai jylla bad la buh hakhmat eh ba yn ai kam shwa ia ki trai shnong kiba don ha katei ka thaiñ ban shna ïa ka ropeway.
“Lada ngi la dep ban shna ïa ka Ropeway ka jingai kam kaba beit beit kan poi ym duna ïa ka 500 tylli kum ki Ropeway Operator, ki Guard, ki nongdie tiket bad kiwei kiwei, katba kiwei pat ki kam ki bym long beit beit (Indirect) kin kham bun kiba kynthup ïa ka buh ki Restaurant, ki Homestay, bad kiwei kiwei ki ban long ki jingmyntoi kiba bun bha ïa ka jylla,” ïathuh u Bah Paul Lyngdoh ha ka sngi Palei.
Kumta khnang ba kane ka jingshna ïa ka Ropeway kan long kaba ïaid beit ïaid ryntih u Bah Lyngdoh u la ong ba ka sorkar ka plie barabor ïa ka jingkhang na ka bynta ki lad jingïakren pynbeit bad ban ïa pynsngewthuh haduh ka kyrdan jong ka Director bad kiwei ki heh ophisar na ka bynta ban ïoh ki jingmut kiba shai na kiba pyrshah bad kumjuh ruh ba na ka liang ka sorkar ruh kan pyni ïa ki kaiphod halor ki jingsngewkhia jong ki halor kane ka project.