Shillong, Naiwieng 05: U Riewshemphang ka sawdong sawkun ne Environment Expert u M Rahman la ïathuh ba ka Environment and Social Impact Assessment na ka bynta ka projek Shillong Ropeway ka dei kaba la pynkhreh da ki riew shemphang kiba laitluid, la bishar bniah ha ki bun kyrdan bad la mynjur da ka Bank ba bei tyngka.
Ïa kane utei u riewshemphang ka sawdong sawkun ne Environment Expert u la ïathuh haba kren sha ki lad pathai khubor ha ka sngi Palei hadien ba ka la mih ka jingïakhih kaba dang ïaid shakhmat mynta ban pyrshah ïa kane ka projek.
U la ong, “Ïa kane ka jingpeit bniah ïa ka jingktah ïa ka mariang bad ïa ka imlang sahlang la pynkhreh da ki riew shemphang ba laitluid, ki riew stad shaphang ka mei mariang bad ha ka kyrdan jong nga ruh, ngi la bishar bniah bad ki don ruh ki jingpynkylla.”
“Nalor kata, ngi la phah ruh sha ka Redevelopment Bank kaba pyntreikam ïa ka project. Ka Bank ka don ruh ïa ki kyrdan bapher bapher bad ïa ki jingshem jong ka ruh la pynrung lang ha ka jingpeit bniah,” u la ïathuh.
Na ka liang jong u, u la ong ba la pyndait ruh da ki Trap Camera ha khlaw ha ka por wad bniah ïa ka jingdon ki mrad khlaw ha ka jingïatreilang bad ka tnat ki Kam Khlaw (Forest).
U la ong, “Ngi la leh ïa ka jingwad bniah da ka pyndait da ki trap camera ruh. Ngi la kyrpad ïa ka tnat Forest. Ha ka jingshisha ki don ki jait mrad kiba la jan duh jait. Ngi la shna ïa ka plan haba ïadei bad kata kaba ngin sa pyntreikam ha ka por ba dang pyntreikam ïa ka Project bad hadien ba la dep shna.”
Halor kane, u Rahman u la ong ba ka Project Shillong Ropeway ynda la dep shna, kan ïaid halor ki dieng.
U la ong, “Shisien ba la dep shna, ka Ropeway kan ïaid nalor dieng, kumta ka jingktah kaba lah ban long ka lah ban long ha ka por ba shna, na ka bynta kata ngi don ïa ka plan ban pynduna ïa ka jingshah ktah ki mrad bad ka Bank ruh ka la dep mynjur ïa ka.”
U la pynthikna ruh ba ha ka por ba shna, yn sa don ka jingïapeit bha.
Katba ka Director ka tnad Tourism ka Kong B Pakyntein ka la ong ba ka tnad ka dang plie lad ban ïamir jingmut bad ban ïakren bad ka Joint Action Committee kaba pyrshah.
Ka la ong, “Ngim long kiba pyrshah ïa ka jingïamir jingmut ne ki jingïakren.”
Shuh shuh ka la ong, “Don napdeng jong ki, kiba la ai jingmut ba ngi dei ban wan hiar sha ka thaiñ bad ban ai pynlong jingsngewthuh paidbah. Ngi plie lad ïa kata. Ka jingpynsngewthuh kan dang ïai bteng.”
Ka la ong ba la khot bunsien ïa ka JAC ban ïakren hadien ba ka la aiti ïa ka dorkhas.
“Ngi la khot bunsien ïa ka JAC, namar ngi la ïoh pdiang ïa ka dorkhas na ki. Ngi la khot ïa ki bunsien. Ki la wan ban ïakynduh ïa nga ruh. Mynta ka step, nga la kyrpad ïa ki ban ïadonlang. Ki la sngew ba ka long kaba lehnohei ban ïai kren,” ka la ong.
Shuh shuh ka Director ka la ïathuh, “Nga la pynkynmaw ïa ki ba ngi dei ka ri synshar paidbah bad ngi hap ban ïakynduh bad ïakren. Lada ngim khot ïa ki, te kin ong ba ngi la khang ïa ki jingkhang jong ngi, bad kata kam dei ka jingshisha.”
Ka la bynrap da kaba ong, “Ngi ïai plie ïa ki jingkhang jong ngi. Ki lah ban wan ban ïakynduh ïa nga ne kino kino ki ophisar jong ka tnad.”
Ka la ong ba la dep ban pynlong ïa ki prokram pynsngewthuh bad ki jingpynsngew na ka bynta baroh ki nongshim bynta, kynthup ïa ka tnat PHE bad SMB, bad la pynbeit ïa baroh ki jingartatien.
Shuh shuh ka la ong, “Ngi la ai ïa ka jingpynsngewthuh, ngi la ai ïa ka jingpyni khnang ba baroh kin ïohi. Baroh ki nongshim bynta ki la leit sha kine ki jingpynsngewthuh baroh naduh ka PHE, SMB, kumta baroh ki jingartatien ki la jah noh.”
“Lada donkam ban pynshai ïa ki jingartatien, lada donkam ban pynsngewthuh shuh shuh, ngin sa leh ïa kata bad lada ka JAC ka kwah ban don biang ka jingïalang kaba pura, bad baroh ki nongshim bynta ne tang bad ngi, ngin pdiang sngewbha shisha ïa ki,” ka la ong.
