Jowai, Rymphang 24: U District Magistrate jong ka West Jaiñtia Hills District u bah B.S. Sohliya, IAS, ula pyntip ba kum shi bynta ban bud ryntih ïa ki aiñ bad kyndon jong ka Election Commission jong ka ri India ne ki SOP na ka bynta ki 72 kynta haduh ka sngi ñiew vote ula hukum ban pyrkhing bha ïa ka ïaid ka ïeng jong ki kali na kawei ka jylla sha kawei, na ka wei ka District sha kawei bad ruh ha ki bynta khappud (International Border).
Ka jingpyrkhing ka long shi bynta ban teh lakam ïa ka jingthmu jong ki katto katne ki briew kiba thmu ban rah pisa be-aiñ ha kum kine ki por ba don ka elekshon. Dang shen ha kine ki por ba la dep kala don kum kane ka jingjia ha ki bynta khappud ka Meghalaya bad Assam, kumta na ka liang u District Magistrate ula hukum ba dei ban peit ngor bha halor kane.
Kumta la pynjari ruh da ka kyndon 144 CrPC kaba la khang ïa ka jingïaid laitlan jong ki kali ki riew shimet bad ki kali kamai ban rung na kawei ka jylla sha kawei pat, na kawei ka District sha kawei pat kumjuh ruh ha ki thaiñ khappud. La pyrkhing bha ruh ïa ka jingïaid jong baroh ki jait kali bad ki briew ha ki bynta khappud bad la khang ruh ïa ka jingïaid jong ki briew na kawei ka District sha kawei pat lymda dei na ka kam thep vote.
Ïa kane ka hukum la pynmih bad pyntreikam noh naduh mynta ka janmiet jong ka 24 tarik u Rymphang 2023 naduh ka por 4:00 PM bad kane ka hukum kan neh haduh ka 27 tarik mynta hi u bnai.
