Jowai, Risaw 06: U MDC ka Jowai South Constituency u ma Moonlight Pariat haba kren ha ki nongpathai khubor hynne ka sngi ha ophis treikam jong u ula ong ba ka jingrung BJP jong u ka long halor ki lai tylli ki daw kiba hakhmat eh kata ka long ka jingpyllait ïa ka jingtih Dewïong, kaba ar ban weng noh ïa ka paragraph 12 A khnang ba ka District Council kan ïoh jingïarap beit beit na Delhi ïa kino kino ki skim kiba ïadei bad ka Council bad kaba lai ban pynphai ïa ki shnong Khasi-Pnar kiba don ha Block-1 bad Block-II shapoh ka jylla Meghalaya.
Nangta u ong ka jingrung jong u sha ka BJP ka dei halor kine ki daw kiba la kdew haneng bad lada urlong kine ki jingdawa katno kan long ka jingkmen ïa u kum u nongmihkhmat uba la rung sha ka BJP, da kaba pynsngew ruh kiba bun ki nongshong shnong ki im da kaba tih dewïong, ki Khasi Pnar kiba don ha Block-1 & II ki la im jingjar da ki phew snem da ka jingbym don u pud u sam uba tikna hapdeng ka Meghalya bad Assam. Nangta u ong kaba bha eh ba ki District Council kin ïoh ïa ka direct funding ba kin pyntrei kam ïa kino kino ki kam pynroi hapoh ki District Council.
Haba ïadei bad ka jingdawa ban pynphai biang ïa ka Elaka Nongphyllut kaba dei kawei na ki Elaka jong ka Ri-Khadar Dolloi ula ong ba kino kino ki briew kiba don ki kot ki sla kiba ïadei bad kane ka kam ba kin pynpoi sha u ba un ïoh ban ïakren bad ki Myntri ha Delhi kloi katba lah, naba ha kine ki khyndiat sngi ban wan un leit sha Delhi ha ryngkat ka kynhun, la pynkut u ma Moonlight Pariat.
