Kyntu ka KJYSU ïa ka sorkar bad JHADC ban pynbeit halor ki kam ka Coal India Ltd
Jowai, Naiwieng 16: Ka Khasi Jaiñtia Youth Student Union (KJYSU) ka ong, ki paidbah Jaiñtia ki dei ban sngewthuh, ba ka Coal India Limited kam tih dewïong ha Meghalaya, ka tih ha Assam NEC, Margherita, ka kit ïa u Dewïong jong ka lyngba ka Meghalaya bad ka die ha Meghalaya ka rah ïa ka Challan, ka e-Auction tang ban lah ban die ïa u Dewïong jong ka.
Ka Challan kam dei ka Permission ban tih dewïong ha Jaiñtia. Ka dei tang ka kot ban kit bad die. Lada uno uno u ong ba u don Challan Coal India ban tih dewïong ha shnong jong phi, kata ka dei ka jingpynbiej, ong ka seng.
Shuh shuh kala buh jingkylli balei ka Sorkar Jylla ka ngeit ïa ka Challan Coal India kumba ka dei ka Permission ban tih? Balei ka ailad ïa ka Coal India ban die, katba u Dewïong jong u trai shnong Jaiñtia u shah khang? Ka Sorkar ka dei ban jubab hapoh 15 sngi.
U Dewïong u dei jong ka Dorbar bad jong ka jait bynriew jong ngi ki Jaiñtia. Kano kano ka jingtih ha Jaiñtia ka dei ban ïoh ïa ka NOC na ka Dorbar Shnong bad naka JHADC shuwa.
Ka seng ka ong ka Article 244 (2) jong ka Constitutional – Ka Sixth Schedule ka treikam ha Jaiñtia. Ka Sixth Schedule – Ka JHADC ka don ïaka bor ban thaw ïa ka aiñ halor ka khyndew, ka khlaw bad u Dewïong. Ka Paragraph 12A, Sixth Schedule ka ong- Kano kano ka aiñ jong ka Parliament kam treikam ha Jaiñtia lada ka JHADC kam monjur ïa ka. Ka Article 19 (5) bad Article 21 – Ka hok jong u trai shnong ban ïada ïa ka khyndew bad ka jingim jong u.
Halor kane ka JHADC ka dei ban pynshai mynta hi – Ka Challan jong ka Coal India ka treikam ne kam treikam ha Jaiñtia? Ka JHADC ka dei ban thaw ïa ka aiñ jong ka hi. Lada ka JHADC kam shim rai, namar ka Sorkar bad ka Coal India kin shim rai ha ka jaka jong ka.
Ka Jingdawa jong ka KJYSU ka long ba lada ka Sorkar bad ka JHADC kim shim khia, ka KJYSU ka hap ban pyrkhat da kum wei, da ka jingïalang paidbah bad lada donkam da ka Court katkum ka Sixth Schedule.
U Dewïong jong ngi u dei jong ngi bad u Dewïong jong ka Coal India u dei jong ka. Pynkut ka kyrwoh na u D. Shulet, General Secretary bad K. Bareh, Assistant Secretary, KJYSU.