Per ki jaboh ha Wah Umtrew, suba ba wan na ki karkhana ha Byrnihat
Nongpoh, Naiwieng 16: Ka jingmih bad jingper jong ki jaboh kiba suba ba ki wan na ki karkhana ha ka thaiñ Byrnihat, ka la pynkhuslai bad pynsngewkhia jur ïa ki paidbah hadien ba kitei ki jaboh ki la tuid bad per ha ka wah Umtrew ha Byrnihat.
Kane ka jingjia ka la paw pyrthei ha ka janmiet jong ka Sngi U Blei, ha kaba la sakhi ïa ki jaboh kiba tuid bad per ha katei ka wah khlem sangeh, bad kane ka jinglong ka la bteng haduh ka step jong ka sngi nyngkong.
Haduh mynta, ym pat lah ban pynthikna na kano ka karkhana ha Byrnihat kaba la pynmih ïa kitei ki jaboh bad pyntuid sha wah Umtrew.
Halor kane ka jingjia, u Bah Sosthenes Sohtun, Myntri Sorkar ba dei ruh u MLA bad MDC ka Jirang, u la ujor bad pyntip sha ka Meghalaya State Pollution Control Board (MSPCB), da ka jingthmu ban pynlong ïa ka jingtohkit kaba bñiah ban lap ïa ka karkhana kaba donkti ha kaba pynmih bad pyntuid ïa kitei ki jaboh sha katei ka wah.
Ka jingkhmih lynti ka long ba ka tnat Meghalaya State Pollution Control Board kan shimkhia mardor ïa kane ka kam, khnang ban lap ïa ka jingshisha bad ban shim ïa ki sienjam kiba donkam ban tehlakam ïa ka jingjaboh jong ka wah Umtrew, kaba long ka jingeh kaba ktah ïa ka mariang bad ka koit ka khiah jong ki paidbah ha katei ka thaiñ.