Nga mih ban ïa khun na Nongpoh na ka bynta ki duk ki rangli kiba la shah iehnoh beiñ, ong u kyrtong ka TMC na Nongpoh

0

Nongpoh, Rymphang 24: U kyrtong ka TMC na Nongpoh Constituency, u Bah Longsing Bey haba pan jingkyrshan na ki paidbah ka Nongpoh Constituency ban kyrshan ha kane ka election jied nongmihkhmat jong u snem 2023 ka ban long ha ka 27 tarik u Rymphang 2023 hapoh ka jylla, u la ong ba kum u riew rangbah u la mih ban aireng na Nongpoh Constituency ka dei na ka bynta ki duk ki rangli kiba la shah iehnoh beiñ ha ka imalang ka sahlang.
Haba kren bad ki Nongthoh Khubor, u Bah Longsing Bey, u la ong kum u kyrtong ka TMC u la mih ruh ban ïa khun na ka Nongpoh Constituency kum ka head quarter ka jong ka Ri Bhoi District ka dei namar ba u angnud ban wan rah kata ka jingkylla hapoh ka Constiteuncy kaba dang sahdien ha baroh ki laing bad kaba long ruh ka jinglehrain ban tip khot kum kata ka Head Quarter jong ka District katba kane ka Constituency ka dang sahdien ha baroh ki liang khamtam ki lynti ki synkien tang mar ïa rung sha ki shnong nongkyndong la iohi shai kdar ïa kata ka jingsahdien jong ka Constituency.
“Nga la shim ïa ka rai ban ïakhun na kane ka Constituency ka dei ruh shi bynta ba kum u riew rangbah uba la rung sha ki thliew ki syar jong ka Nongpoh u la lap shibun ki jingduna bad khamtam ka jingshah iehnoh bein ki baduk ba kyrduh namar kumba 90 percent ki longing ki dang dei kiba im ha u line jong ka jingduk bad ki shah iehnoh beiñ khlem da don kita kiba peit ba khmih ïa ki” ong u Bah Longsing Bey, bad bynrap ruh ngam shym la mih ban ïarap na ka bynta kita kiba la bit la biang bad ka thong ka long ban ïarap kyrpang tang ïa kito ki duk ki rangli kiba la shah iehnoh beiñ ha baroh ki liang” u la bynrap.
U la ong ruh ba u don ka jingkyrmen ban jop namar 90 percent kiba duk ba rangli ki wan ban ai jingkyrshan ïa u man la ka sngi namar ki sngewthuh shaid ba ka nongrim kaba u ïa khun ban ha kane ka election ka dei na ka bynta ki duk ki rangli bad la jin ba u jop ha kane ka kynti ka long kaba phylla ba kiwei ki kyrtong kin nym nud shuh ban wan ïa khun ha kaba lada ki paidbah ki la pynjop un pyndep lut ban pynurlong ïa baroh ki jingangnud jong ki duk ki rangli.
Shuh shuh, u la bynrap ruh ba kiwei ki thong kiba u angnud ka long ban ai kam ai jam ïa ki khun samla da kaba un kyntiew ïa ka pule ka puthi da kaba wan rah ïa ki jaka pule kiba bit ba biang, ban kyntiew ïa ki kam Karkhana, ban kyntiew ïa ki kam jngohkai pyrthei bad ruh ban kyntiew ïa ka rep ka riang bad lada ngi la lah ban pynurlong tang kitei ki saw tylli ki mat ba kongsan ka jingkylla ka la wan lypa hapoh kane ka Constituency, u la bynrap.

Leave A Reply

Your email address will not be published.