Ka tynrai jong ka jingsdang ka bam sap ka dei na ka khyllipmat ba u Candidate u sam pisa: Baitlang Pohsngap

0

Jowai, Rymphang 24: U ma Baitlang Pohsngap kum uwei na ki nongshong shnong jong ka sor Jowai mynta ka sngi Thohdieng ha ka jingïakren bad u Mawphor, ula buh ka jingkyntu ïa ki paidbah hashwa ban poi ka jingthep vote haka 27 tarik u Lber 2023 ki die ban long kiba husiar ïa ka lawei namar kane ka dei ka ïap ka im jong ki ri bad ka jaitbynriew.
Shuh shuh ula pynsngew “ba ka tynrai jong ka jingsdang ka bam sap ka dei na kato ka por jong ka khyllipmat ba u Candidate u sam pisa bad u nongthep vote u shim ïa ka pisa bad kane ka la pur sha ki bynta bapher bapher jong ka ri bad ka jaitbynriew”.
Mynta ki nongmihkhmat kim long shuh ki nongthaw aiñ ne ki law maker, hynrei ki kylla long ki business maker ha ka synshar khaddar. Ym tang kata ki dei ki nongkwan bor, kwah burom bad kin kamai spah shuh shuh la pynsngeng u ma Baitlang.
Kum u nongshong shnong u don ka jingsngewkhiah ïa ka ïap ka im jong ka Ri bad ka jaitbymriew halor ka rukom jied ïa ki nongmihkhmat ha kane ka kynti, u ong na kawei ka san snem sha kawei pat kala dei ban long ka jingkyrkhu ïa ki paidbah, hynrei kaei pat kaba jia ka long hapoh kane ka Ri ba ieit ka long da khongpong, “katba nang ïaid ki por ki sngi ka jinghiar dor bad ka jingjot arsut ka synshar khaddar hapoh kane ka ri ba ieit kala nang jur bad kane ka la buh jingeh ïa ka pateng ban wan”.
U ma Pohsngap ula buh jingkylli balei ki wan kine ki jingjia ba sniew? bad ka dawbah hi ka long ba mynta kiba bun kila ai lad ba ka spah kan synshar, ym shuh da ka bor jong ka jingstad da kaba u ong ïa kine ki kyntien “Vision can make Money but money cannot make Vision”. Da kaba u ong ba u briew uba thied vote um dei u nongïalam ba shisha hynrei u dei u nongshukor, katba u nongshim pisa ruh u long u nongpynkheiñ aiñ.
Ula pynpaw ruh ka jingsngewsih na ka bynta ki khun samla kiba don mynta hapdeng ka jingduh jingkyrmen ha ka liang ka ïoh kam ïoh jam, wat haba kila pyndep ïa ki kyrdan jingpule ha ki laiñ bapher bapher.
“Ym tang kata ka jinghiar dor jong ka kamai ka jih kala long shaba palat, ka jinghiar ka jinglong akor, ka long briew man briew, kat haduh ba kiwei ki jait bynriew ba nabar ki nud ban tynjuh bor ïa trai ri, kum ki nongshong shnong ka jaitbynriew ki dei ban pyrkhat bha ïa kane” ong ma Baitlang.
Ula kren ruh shaphang ki jingeh ha kaba ïadie bad ki nongtrei kam sorkar khamtam ki nonghikai ha kine ki snem ba la dep kiba la hap ban shah thngan bad ban thiah ha ki surok bad dawa ïala ka jong ka hok.
Shuh shuh ula pynsngew halor ka jingduhnong jong ka sorkar jylla na ka daw ka jinglehbor jong ka rukom khaïi tuh ïa u Dewïong kaba la ïaid shait shait wat na ka liang ka NGT kala khang pyrshah, ula ong ba kane ka la wanrah ka jinglait tuh (Leakage) ka pisa kaba dei ka khajna (revenue) jong ka sorkar.
Ha kaba ïadei bad u pud u sam u ma Pohsngap ula ong ba haduh mynta la 50 snem ka jylla kam pat ïoh ïa u pud u sam uba tikna.
Halor kine ki jingeh baroh u buh ka jingkyntu ïa ki paidbah nongthep vote ka jylla baroh da kaba ong ïa kine ki kyntien wat ai shuh ïa ka vote ba kordor jong phi sha kiba ai pisa, horkit kordang wat nym pynjop election shuh ïa kiba ïaid da ka spah bad kiba thied vote da ka pisa namar wat ka aiñ ruh kam shah.
Na ka liang u ma Baitlang sa shisien u buh ka jingkyntu naduh ki longkmie ki longkpa bad ki khun samla kynthei bad shynrang jong ka bri hynñiewtrep hynñiewskum ha kane ka kynti jied nongmihkhmat MLA kim dei ban shah thied ha ka bor ka pisa pynkut u ma Baitlang Pohsngap.

Leave A Reply

Your email address will not be published.