Da ki hajar ngut ki paidbah ki nongkyrshan u bah Shitlang Pale ki la ïa poi sha ka rally ha shnong Jalaphet

Khliehriat Rymphang 24: Da ki hajar ngut ki nongkyrshan jong u kyrtong ka UDP, jong ka Sutnga Saipung Constituency, mynta ka sngi ki la wan ban ïa shimbynta lang ha ka rally ba la pynlong ha ka shnong Jalaphet, ha madam ‘Kdoh Muid’, ki nongkyrshan ki kynthup ruh kito kiba na ki thaiñ khappud, na Huroi, Hingaria, Umkiang, Ratacherra bad kiwei kiwei ki shnong khappud ryngkat lang bad ki paidbah jong ka constituency, la ïa don ryngkat lang ruh ki nongialam jong ka UDP na East Jaiñtia Hills District.
Haba kren ha ka jingïalang, utei u kyrtong jong ka party United Democratic Party na ka 5-Sutnga Saipung Constituency, u bah Shitlang Pale, uba dei ruh u MLA ka thaiñ, u la kyntu jur ïa ki paidbah nongkyrshan ba kim dei ban shah pynbiej ha ki ar ngut ki kyrtong riewspah, ki malik, kiba dei na ka party NPP bad ka party Congress “ha kaba kin sa wan sha ki ïing ki sem ban ban tyrwa da ka pisa, ka spah ka phew, hynrei san snem lynter pat shano phin wad ïa ki? Hynrei kynmaw ba ha ka pang ka shitom nga hi nga ju don ryngkat lang beit bad phi ki paidbah”
U la pynpaw ruh ïa ka jingsngew bynñiaw ba ha kine ki san snem ba la leit u khlem iohlad bha ban ïarap ïa ki paidbah na ka daw ba um shym la don ha ka liang synshar bad u don ha ka liang pyrshah, u la ong ruh ba ka jingleit pynïasoh jong u bad ka party UDP ka dei namar ba kane ka party ka i don jingkyrmen ban ioh thaw sorkar bad lada ioh ban thaw sorkar ma u ruh kum u nongmihkhmat un ioh bha ki lad ki lynti ban ïarap ïa ki paidbah bad ruh ban wanrah ïa ka roi ka kiew ha ka thaiñ “Ha kito ki por ba la leit, shibun ki kam kiba nga angnud ban wanrah sah ka thaiñ kum u MLA, hynrei nga iohi bun ki jingeh namar ba nga don ha ka liang pyrshah, katba myn ha kito ki por ba nga don ha ka sorkar bad ba nga dang long ruh kum u myntri sorkar, bun ki skim , bun ki kam pynroi nga la wanrah sah kane ka thaiñ, nga la wanrah ruh ïa ka district ba thymmai, ka East Jaiñtia Hills District ha ka por ba nga don ha ka sorkar, bun ki paidbah mynta kin lyngngoh ïa nga haba bun ki snem nga la don bad ka congress hynrei mynta nga wan sha ka UDP, kane ka dei namar ba nga ïohi ba kane ka party congress mynta ka la nang tlot , nang hiar, nga ïohi ba kam lah ban shna sorkar wat ha Delhi ruh, kumta nga la pynïasoh noh bad ka party UDP namar ba kane ka constituency ka dei kaba dang sah dien, te lada nga dang shong biang sa san snem ha ka party congress kan long ka jingduh nong ïa ki paidbah ka thaiñ, nga tip bad nga sngewthuh ïa ki jingeh jong phi ki paidbah bad nga leit sha ka UDP ruh da ka jingiasngewthuh jimngmut lang”ong u bah Shitlang Pale.
U la ai khublei ruh ïa ki paidbah nongkyrshan jong u kiba la wan ban ïa poi lang sha kane ka rally.
U bah Lasky Rymbai, u ong ba ka party UDP ka dei ka lawei jong ka jaitbynriew, u ong ruh ba ka election kam dei ka kam tamasa hynrei ka dei ka lawei ki khun samla, ka lawei ka jaitbynrew khamtam ha East Jaiñtia Hills, u kyntu ïa ki paidbah ba ki dei ban kyndit bynriew noh lym kumta ka lawei jong ka East Jaiñtia Hills kan sa duh kan sa dam lada ym kyndit bynruew mynta.
U samla Wa-o Sapooh, u la ther jur ïa ka kyrtong jong ka NPP, ka kong Santa Mary Shylla bad ong ba u la buh jingkylli ïa ka “kaei kaba pynlong ïa phi ban ïaleh elction, ka la jubab ba ka kwah ban shakri ïa u paidbah. Nga ong balei kwah shakri ïa u paidbah? ha kano ka nongrim, haba phi la buh da ki karkhana coke ha kylleng kylleng ka East Jaiñtia Hills jong ngi, kam tip shuh ban jubab, nga ong ruh, kong Santa phi dei ka Presidet Coke, sngewbha wat ju pynbiej ïa ki khun ka Sutnga Saipung Constituency, lada phi la ieh ïaka kam President Coke ïa ngin ïa leit shatai sha Umtyra ngin pynpara noh ïa ki karkhana coke” u la ong ruh ba mynta ka jingshah pynbiej ki paidbah ki dei na ka party NPP bad party congress bad kynthoh ruh ba kine ki dei tang ki nongpynbiej briew namar ba ki iohi ba ka la beh ka lyer u bah Shitlang Pale uba dei u MLA ba jai jai.
Ka kong Deiwi Tongper, kaba na ka shnong Umkiang ka la ong ba “ Da ka jingieid ngi kyrshan ïa u kyrtong UDP, u bah Sitlang Pale, nga la ngiah ïa ka NPP, san snem nga la leit rah lama ïong ha Shillong ,na ka daw ba ka sorkar NPP ba la lam khmat da ki Sangma Brothers , u Conrad Sangma bad u James Sangma, ki ibeiñ ïa ka jaitbynriew jong ngi, ki bym ju sngew ïa ki jingdawa jong ngi, ha kane ka kynti sngewbha kyrshan ïa u bah Shitlang Pale, ailad ïa ka party ban synshar marwei bad hangta ngin ioh ïa ki jingdawa bad kan don ka jingkyrmen ïa ka jaitbynrei ba rit jong ngi”
U bah Marshall Biam, u la kynthoh jur ïa ka party NPP da kaba ong “Mano ba long High Level? , ka dei ka NPP ba la ïalam da u Conrad Sangma , ka pisa u kjit na ki paidbah ban ïaleh elction bad kane ka party ka dei kaba la seng na Garo, pyrkhat ar sien paidbah” u kynthoh jur ruh ïa ka kyrtong ka NPP da kaba ong ba “ka kyrtong NPP kaba leh bor ïa ki rit ki ria, ha ki kam ki jam, ka bym pyrkhat ïa ki longkmie long kpa, ka bym pyrkhat ïa ka imlang ka sahlang , kaba sngew ha nga bad ka la wan sha ki thaiñ Narpuh bad ka la pynbiej da ka surok, katba kane ka surok ka dei kaba la iakhun da u paidbah, ha ki mawnongrim ruh ki don ka kyrteng u kyrtong, u bah Shitlang Pale, ngin ai jingsneng ruh ïa u kyrtong congress ha ka 2 tarik” u kyrpad ïa ki paidbah ba kin da pyrkhat jngai bad pyn shong nongrim bad ban kyrshan ruh ïa u kyrtong ka UDP, u bah Shitlang Pale.
Kiba la ai jingkren ki kynthup ruh, u bah Fineliness Bareh, u MDC ba rim , u bah D.Pohshna bad kiwei kiwei