Shillong, Rymphang, 24: Da ki phew spah ngut ki nongkyrshan jong u Bah Paul Lyngdoh uba long u Kyrtong jong ka United Democratic Party na West Shillong Constituency ki la ïashim bynta ha ka jingïaid rally hapoh ki shnong jong ka West Shillong Constituency ha ka sngi Thohdieng.
Ïa kane ka rally la sdang na iingsah jong u Bah Paul Lyngdoh bad la pynkut pat ha madan Muslim kaba don ha Kyrbom ha kaba u Bah Paul u la ai jingkren sha ki nongkyrshan ba shwa ban pynkut ïa kane ka rally da kaba kyntu ba kin ïai neh jingmut bad ka UDP haduh ka 27 tarik u Rymphang, 2023 kaba dei ka sngi ba ka jylla Meghalaya baroh kawei kan jied ïa ki nongmihkhmat ba thymmai sha ka Iingdorbar Thawaiñ jong ka jylla.
