U MLA jong phi u la pynlehraiñ ïa jaidbynriew bad u la phla ba u shu pynbiej, ai jingsneng noh mynta: HYC

Pynursla, Rymphang 24: Ka Hynñiewtrep Youths’ Council (HYC) ha ka sngi Thohdieng ka la hiar sha Pynursla ban pynshai paidbah ïa ka jingjied nongmih khmat sha ka ïing dorbar thaw aiñ ka jylla kaban sa long ha ka 27 tarik Rymphang ha kaba ha kane ka sngi na ka liang ki nongïalam ki la kyntu ïa ki paidbah ka thaiñ ban ai jingsneng noh ïa u MLA ka Pynursla u bah Prestone Tynsong uba la kam ba u shu pynbiej man ka san snem bad ki paidbah ruh ki ngop man ka san snem.
“Kumba u la phla da lade ba u shu pynbiej ïa ki paidbah man ka san snem bad ki paidbah ruh ki nongop bad nga sngew ba kane ka la dei ka jingkren jemdaw kaba khraw bha ïa phi ki War ba stad bad ngam ong satia ba phi dei ki biej, namarkata nag kyntu ïa phi ban pynbiej noh sa ma phi ha kane ka kynti da kba pynrem noh ïa uta uba phi la shah pynbiej,” ong u Bah Donboklang Kharlyngdoh u Vice Pressident ka HYC, haba ai jingkren ha Pynursla.
“Kine ki nongïalam ba ngi la phah ha kaba u MLA jong phi uwei na pdeng kita ki nongïalam u la pynbiej bad leh sat ruh ïa ka jaidbynriew bad ïa ki dkhot jong ka, u la pynduh tulop ïa ki nonghikai, pynduh Scholarship ïa ki nonghikai, u sait tear gas ïa ki nonghikai, u la wanrag ktem khalai, u la leit siat ïa u doh u snam jong ngi shiteng synïa ha Mawlai bad kiba bun ki jinglehsat bad u la pynbiej da kaba ong ban kyndang ïa kiba sah ha Them Ïewmawlong, ban pynïoh ILP bad pynrung ïa ka ktien Khasi ha ka Eight Schedule bad kiba bun ki jingkular pynbiej namarkata phi dei ban ai jingsneng noh ïa une u kapten jong ki nongpynbiej,” u la bynrap.