Shillong:Ka Hynniewtrep Youths’ Council- Shella Area Unit (HYC-SAU) dang shen ka lah ioh ban noh synniang da ki kopi ia ki khynnah skul kiba pule naduh Class V haduh Class X ha ki skul kiba don hapoh ka Shnong Shella. Ia kane ka prokram lah ioh ban pynlong ha Ing Dorbar Kher Sohlap-Umdoh-Mawpot, Shella. Lyngba ka jingiarap na ki Kher kiba don ha ka Shnong Shella, lah ioh ban jied ia 5 Ngut ki khynnah pule na kawei pa kawei ka Kher katkum ka jingibit jong ki Nongialam Kher da kaba peit ia ki longing kiba donkam bha ka jingiarap.
Ki Nongialam bad ki dkhot ka Seng ha ka jingiadon ryngkat ki kmie ki kpa, ki lah ioh ban sam jingiarap ia ki 45 ngut ki khynnah pule ka Shnong da ki kopi katkum ka jingdonkam ka jong ki bad katkum ka Class kaba ki pule.
Na ka liang ka Seng ka kyntu ia kine ki khynnah pule napoh Shnong ba kidei ban minot thop ha ki jingpule ki jong ki bad ban nym ailad ia ka jingduk ban long U diengpynkiang bad ban pynbor ia ki ba kin pep skul noh shipor.
