Nga la lah ban pynurlong ïa ka jingdawa ban pynjlan rta thep kam: Adelbert

Shillong, Rympahng 24: U MLA barim ka North Shillong uba long ruh u kyrtong ka VPP na kane ka constituency u Bah Adelbert Nongrum u la ong wat lada u hap ban ïeng marwei ïa ka jingdawa ban pynjlan ïa ka rta thung kam ha ka jylla hynrei u la lah ban pynurlong ïa kane ka jingdawa kaba u la rah.
“Lada ïa ka rta thungkam kum u MLA ba tang marwei nga lah ban pynurlong ïa kane ka mat mynta lei nga don lang haka kynhun jong ka VPP kaba don ki riew shemphang bad ki khraw pyrkhat ryngkat u nongïalam bym ju tieng ngam don jingartatien ba ka jingïohi jong i ba ka donkam ban pynkylla ïa ka Reservation Policy kan long kaba jop,” ong u bah Adelbert ha ka jingïalang ka VPP ha Mawkhar.
Shuh shuh u la ong ba ka jingïakhun elekshon jong u kam dei tang ban jop ma u hynrei kan dei ruh ka jingjop ka jaidbynriew bad ki nongrim kiba u ïeng.
“Dei ba nga don ka nongrim bad ngam ju treh ban pyndem ïa ka nongrim kaba nga don tang na bynta ban jop elekshon, namarkata ka daw kumba nga lah ban kop khyllew ba ngam pat leit iuhkjat satia sha Them Ïewmawlong ban leit khroh vote ïa kito kiba sah be-aiñ namar nga ïeng ha ka nongrim ba dei ban pynkynriah noh namar ka jingdon jong ki ha katei ka jaka la la pynsyllang ïa ki nongleit nongwan,” u la ong.
“Ki don kiba ong ba nga dei u briew uba ïaid da ka jingsngew haba nga kren dorbar, hynrei nga kwah ban ong ba dei ba nga don jingsngew ieid keiñ ïa ka jaidbynriew nga ïeng ban ïakhun na bynta jong ka marwei wat hapdeng ka jingshah ieh marwei ha ki 35 ki para doh para snam kiba ym don jingsngew shuh,” u la bynrap.
Ha kane ka sngi la ïoh ruh ka jingkren na u President ka VPP u Bah Ardent Basiawmoit uba la ong ba ka jingkynnoh u kyrtong ka UDP na North Shillong ba ka jingpyntreikam ïa ka Roster system ka dei namar ka jingdawa u Bah adelbert ban pynkylla ïa ka Reservation Policy ka dei ka jingkren khunlung khynnah bad ka jingkren kutlad suda.
“U kyrtong ka UDP na kane ka constituency u dei ban tip ba ym don kano kano ka kyndon (provision) ha ka Reservation policy kaba kdew shaphang kata ka roster system ba dei ban pyntreikam bad ka jingmih kane ka Roster ruh ka dei namar ka hukum ka High Court ym na ka jingdawa pynkylla u Bah Adelbert,” ong u Bah Ardent.
“U shylluit ka roster ym dei hi ruh na ka jingrah ïatai u Bah Adelbert hynrei namar ka leit tied jingkhang sha kashari da kawei ka longkmie Garo bad ynda ka kashari ka la pynmih ba dei ban don ka roster kine ki Myntri na ki party UDP, HSPDP, PDF, BJP ki mynjur beit ïa kane ka roster kaba la pynkreh da ka NPP ha kata ka rukom ba ki Garo kin ïoh jingmyntoi.” u la bynrap.
“Jin lada kine ki myntri kim mynjur kan lah leh aiu ka NPP hynrei namar kim pynpaw ïa kano kano ka jingpyrshah kine ki seng riewlum kiba pynkit pap sha u Bah Adelbert ba sa wan kane ka roster system bad dei namar ngi ïoh ba donkam ban pynkylla ba ngi la pynrung syndon ha ka kular elekshon ban peit bniah biang bad ban pynkylla ruh sha ka aiñ ym shuh tang ka office memornadum,” u la ong.