Shillong, Rymphang, 24: “Ha kine ki saw snem ba la leit noh, lada ka wan makna ka jingkynthoh ba u MLA barim (Bah Process T. Sawkmie) ba u la kren shaphang ka kam kaba nga trei, hynrei to tip ba na ka liang jong phi, phi dang pyntyllun tang ïa ka MLA Scheme kaba dei ka bhah ka bym don eiei ka jingtrei shitom, katba ma nga kum u MDC kumba 100 klur tam nga la wanrah,” la ong u kyrtong ka National Peoples Party (NPP) na Mawlai Constituency u Bah Teiborlang Pathaw haba kren ha ka jingïalang ïalap elekshon ha Mawlai Mawdatbaki ha ka janmiet sngi Thohdieng.
Haba pynpaw ba u don ka jingangnud ban plie lynti ïa ki khun samla kumba ju long baroh shikatta, u Bah Teibor u la ong, “lada nga jop kum u MLA, ngin nang ïalam ïa ki khun ki kti, ïa ki khun samla baieid jong ka shnong Mawlai kiba la nang la stad bad kiba donkam tang ka jingïalam lynti ïa kaba ngin pyni ïa kaei kaba ki lah ban leh katkum ka kyrdan pule.”
U la pynpaw ruh ka jingsngewkhia mynsiem ïa ka jingjyllei jong u drok hapoh ka jylli jong ka shnong Mawlai. “Ngan ïatreilang bad ki Dorbar Shnong, ki Seng Kynthei, ki seng Samla bad ngin ym ailad ba un pynjot ïa ki khun samla jong ngi ba kin lait na u jingdih uba sniew,” u la ong.
“Nga kyrpad rit ïa ki nongshong shnong jong ka Mawdatbaki, kaba dei ka shnong ba la kha bad la pun ïa nga ba kan ailad ïa nga ha kane ka kynti kumba phi la ïohi ha kine ki saw snem ïa ki kam ba nga la trei bad ki nongïalam shnong, sngewbha ban ailad ba ngan long u nongmihkhmat ba ngan trei namarba nga don ka jingangnud ba ngan shakri bad ban pynkylla dur ïa ka shnong Mawlai,” la pan jingkyrshan u Bah Teibor na ki paidbah nongthep vote ka Mawlai Mawdatbaki.
Haba pynshai halor ka jingshah kynthoh ha manla ki jingïalang ha u kyrtong jong ka UDP ïa ka kam kaba u la trei, u Bah Teibor u la ong, ‘nga tharai ba i la tieng palat, im don da kawei kawei ban kynthoh ïa ka kam kaba ma nga nga trei. Ki kam kiba la trei hapoh ka shnong Mawlai ba la pynsangeh, ka jingkylli kaba nga kwah ban buh ïa u MLA barim, nalor jong phi ba phi dei u MLA, uei pat uba kham donbor nalor jong phi ban pynsangeh ïa kata ka jingtreikam.”
Halor ka jingong jong u Bah Process ba lada un jop biang un sa knieh noh ïa ki Work Order na ki Kontraktor jong ka NPP, u Bah Teibor u la ong, “haduh katno phi donbor? Hato ka Work Order phi trei ma phi. Kynmaw ba ïa kine ki kam ym dei ba ai ma phi, ka ai ka tnat PWD.”
U la ïathuh ruh ba u la pynïoh skhim na ka tnat shipai Assam Rifles ïa kawei ka skul ha ka shnong Mawtawar ïa kaba ym ju don satia mano mano ruh ba peit.
U la kyntu ruh ïa u Kyrtong ka UDP ba un da pule bha ïa ka jingmut jong ka kyntien “Enterpreneur’ kaba mut nongseng kam.
Halor ka jingshah kynnoh ba kum u nongaikam u la bam nong ar hajar tyngka na kawei ka kam, u Bah Teibor u la ong, “hato kato ka tnat kaba ai kam kan ailad seh ban leh kumta? Ka dei ka tnat jong ka Sorkar Kmie.”
Ha kaba ïadei bad ka jingkynnoh ba dei tang ka NPP kaba la ïasoi ïa ka soskular ïa pynbeit pud bad ka Assam, u Bah Teibor Pathaw u la ong, “u (Bah Process) klet noh ba ka UDP ruh ka don lang ha ka jingïarai ha ka border ishu. Lada phi sngew khia haduh katta katta ïa ka ishu khappud balei phim ïaleh Independent?
Halor ka jingshah kynnoh ba kum u MDC um ju kren eiei shi kyntien ruh ha Iingdorbar ka KHADC u Bah Teibor u la ong, “ha ka 2 tarik, Nailur, 2022, ka Executive Committee ba ïalam ma ngi ka la mynjur ïa ka Land Bill hadien 40 snem. Kane ka Land Bill ba ngin ïada ïa ka jaka ka puta. Ha ka por ba long MDC ma phi (Bah Process) phim kren eiei ïa kane. Dei ha ka por jong ngi ba la ïoh ïa ka jingmynjur jong u Lat ka Jylla. Mynta ki shnong bad ki hima ki la lah ban ai ïa ki dulir ba la ithuh da ka aiñ Land Bill.”
