EJHDFA: Jop ka Shilliang Umshong SC haka Super Division, Ïakhaid ka jingïakhun 1st Division

Jowai, Risaw 09: Ki resol jong ki jingïalehkai phutbol ka lympung “Super Division” bad ka First Division League 2026 bala pynïaid daka East Jaiñtia Hills District Football Association (EJHDFA) kiba long hynne ka sngi Thohdieng, 09 tarik Risaw ha Artificial Diengshynrum, Khliehriat.
Haba phai sha ka jingïakhun ba nyngkong jong ka 6th Kyrmen Shylla Contribution Trophy League Stage 2026 haka kyrdan “Super Division”, ka kynhun ïalehkai jong ka Shilliang Umshong SC kala jop da 1-0 kol ïaka Sutnga SSCC. Ïa katei ka shikol na ka Shilliang Umshong la thep da u Besterly Ksih haka minit ba 87.
Katba haka jingïakhun jong ka Thomas Nongtdu Memorial Trophy haka kyrdan 1st Division League 2026 hapdeng ka kynhun ïalehkai jong ka Khliehriat West YWSC bad ka Lumshnong YWSC kala kut ha ka jingïakhaid da mar shikol (1-1). Ha ka jingïakhun ka Lumshnong YWSC ka la pynkhihjar ban lamkhmat lyngba u Golden Japai (15’) hynrei ka Khliehriat West ka la jubab lyngba u Plol Dkhar (58’).