Ki briew ba ïapher dkhot met ki don kajuh ka hok, burom ïa ki namar ki don hok ha imlang sahlang: Kong Bridget

Shillong, Risaw 08: Ka Deputy Commissioner for Persons with Disabilities, ka Kong Bridget Warshong ka la kyrpad ïa ki nongshong shnong ba kin burom ïa ki briew kiba don jingïapher ha ki dkhot met naba ma ki ruh ki don kajuh ka hok kumba long kiwei pat ki para briew kiba biang ha ki dkhot met.
Haba kren hadien ba la wai ka prokram hapoh Arts and culture seminar hall hapoh State Central Library, ka kong Warshong ka la kyntu ba dei ban kynthup lang ïa ki ha ka imlang sahlang bad na ka liang ka tnat ruh ka pyrshang ban burom ïa ki da kaba pynbiang da ki tiar ki tar ban ïarap ïa ki ba kin lah ban leit sha ki jaka trei kum ha Secretariat ban shna ki corridor ba kin lah ban ïaid ban leit sha ki jaka treikam.
Ka Kong Warshong ka la ïathuh ruh ba ki long kumba 41 tylli ki building ba la ïoh pynbha da ka jingkyrshan ka Tnat Empowerment for Persons with Disabilities bad ka Ministry of Social Justice Empowerment sorkar Pdeng bad ka sorkar jylla halor kine ki kam.
Haba ïadei pat bad ki tiar ba thymmai ka la ïathuh ba ka Commissioner for Persons with Disabilities ka la ïoh ban wanrah thymmai da ka jingïatreilang ka Bethany Society, ka EnAble India na Bangalore, ka KiBO Tresle Lab ban ai ïa ki table lamb bad kiwei kiwei naba ïa kine baroh la leh da ka jingdon ka aiñ kaba khlaiñ kaba ïarap ïa ki briew ba ïapher ha ki dkhot met kaba dei ka aiñ Rights of Persons with Disabilities Act, 2016 bad ka Tnat kumba long mynta ka dang hap leh bun ki kam ba dangsah lyngba ki jingïatreilang ki tnat sorkar bapher bapher ban ïarap ïa ki briew ba ïapher ha ki dkhot met.
Ka la ïathuh ruh ban ïarap ïa ki briew kiba ïapher ha ki dkhot met na ka liang ka Social Welfare ki la ïatreilang bad ka tnat pulit, ka tnat ka koit ka khiah, ka tnat PHE, ka tnat PWD bad kiwei pat ki shnat treikam na ka bynta ban ïarap ïa ki briew kiba don ki jingïapher ha ki dkhot met.
Ka la ong ba kumba ka long mynta na ka liang ka Commissioner for Persons with Disabilities ka la nang ïaid shakhmat ban buh ki jaka ïeng bad jaka ap bus na ka bynta jong ki bad ïa kine la thmu ban buh ha Khyndailad bad ka IGP Point bad ïa kane la aiti ha ka tnat PWD ba kan dang pynïaid shakhmat ïa ki kam.
“Ngi la thmu ban buh ki jaka ap bad ïeng ki bus na ka bynta ki briew kiba ïapher ha ki dkhot met khnang ba kan pynsuk kan ïarap ïa ki haba ki kiew bad ki hiar na ki bus bad ïa kine la thmu ban buh kawei ha Khyndailad bad kawei ha IGP Point,” ïathuh ka Kong Warshong.