Ka dei ka kamram jong baroh ban kyrshan ïa kiba ïapher ha ki dkhot met, la ka long ha kano kano ka bynta: Saloni

Shillong, Risaw 08: Ka Director of Social Welfare ka Saloni Verma, IAS ka la ong ba ka dei ka jingkitkhlieh lang jong baroh ban ïarap ïa kito kiba ïapher ha ki dkhot met, kum kito kiba duna ha ki bor, ïohi, ki bym lah ban iaid bad kiwei kiwei ki jingïapher ban ïarap ban pynïoh ïa ki tiar ba ki donkam ba ki lah ban pyndonkam manla ka Sngi bad khamtam eh ha ki jaka trei.
Ïa kane ka la kren kum ka kongsan ha ka prokram plie ïa ka Tech Assistive Devices, Solution to Barriers ba la pynlong da ka tnat Commissionerate for Persons with Disabilities ha ka jingïatreilang bad ka Bethany Society Shillong, ka EnAble India kaba na Bangalore ha Arts and Culture Seminar Hall, State Central Library Shillong.
Shuh shuh ka kongsan ka la ong ba kadei ruh ka kamram jong ka kum ka ophisar bad ka tnat baroh kawei ban pynïoh ïa ki lad kum ki tiar ba la shem ha kane ka juk thymmai lyngba ki technology kiba thymmai kaba lah ban pyndonkam da ki nongtrei sorkar kiba duna ki bor ïohi ba kin lah ban trei kham bha ïa ki kam ha ki tnat sorkar bapher bapher.
Ka la ong ba naduh ki nonghikai, ki khynnah skul, nangta kiba sumar ïa kiba ïapher ha ki dkhot met, ki tnat sorkar bad kumjuh ruh ki kmie ki kpa ki don la ka jong ka bynta ban khmih, ban ïarap, ban tynrong lem ïa ki jingeh jong ki ha ka por ba ki donkam khamtam ha ka por ba ki trei ki ktah, nangta ha ka por ba ki pule ha ki jaka pule.
“Ngam lah ban mutdur ba ki khynnah skul ki duna ki bor ïohi ba kin nang ban rwai, kin nang ban tem, watla ki duh ïa ki bor ïohi. Tang lyngba ki jingshah hikai, ki jingsngap ïa ki sur, ïa ki jingtem ba ki la lah ban pynsngewtynnad ïa ngi haduh katne, kan long kaei kaei kaba phylla,” ong ka Saloni da kaba ai mynsiem ïa ki ba kin kiew shaphrang ha ki jingim jong ki.
Ka kongsan ha kane ka sngi ka la plie ruh ïa ka Solutions Display ba la buh ia ki tiar bapher bapher kum ki motorable Wheel chair, Motor Cycle, nangta ki tiar ba lah ban pyndonkam da kiba duna bor ïohi.
La ïoh jingkren pdiang na u Commissioner u Bah Lyngkor Kynjing, MCS, u Francis Lohrii Senior manager EnAble India u ba la ong ba ka Solutions Week 2026 la rakhe naduh ka 3 tarik mynta u bnai haduh ka 10 tarik ha kylleng ki 17 tylli ki partner center ha ki 14 tylli ki State bad Union Territories kum shi bynta na ka “See A Million” campaign, kaba ai lad bad wad ïa ki lad ki lynti ban pynkupbor da ki tiar digital sha ki 1 million ngut ki briew kiba duna ki bor ïohi ne kiba ïohi burngut burnget, la ïoh ki jingrwai na ki khynnah skul ka Jyoti Sroat Inclusive School Bethany Society, la donlang ka Kong Bridget Warshong Deputy Commissioner Commissionerate for Persons with Disabilities bad kiwei kiwei ki prokram.
Ki la don ruh ki jingbatai pynsngewthuh shaphang ki tiar kiba thymmai kum shaphang ka Tri-Bicycle, ka Wheel Chair, ki KiBO Tresle Lab bad kiwei kiwei ki tiar ki ban ïarap ïa ki briew kiba duna ka bor ïohi ba kin lah ban trei ïa ki kam lyngba kine ki kor jong kane ka juk technology ka jingshem thymmai bad kiwei kiwei de ki prokram.