Shongshit ka jingïatai ki kyrtong ka Shillong North ha ka Common Platform jong ka DS Wahingdoh

Shillong, Rymphang 18 : Ka Dorbar Shnong Wahingdoh ha ka sngi Saitjaiñ ka la pynlong da ka rynsan paidbah lane ka common platform na ka bynta baroh ki kyrtong kiba aireng ha kane ka elekshon MLA na Shillong North Constituency.
Na ki phra ngut ki kyrtong kiba aireng ha kane ka elekshon na katei ka constituency, ar ngut ki khlem poi satia, kata ka kyrtong jong ka TMC Kong Elgiva Rynjah bad ruh u kyrtong ka NPP Bah Ransom Sutnga.
Ki kyrtong kiba poi sha katei ka jingïatai paidbah ne ka jingpynshai paidbah ïa ki nongrim ba ki ieng ki kynthup naduh u MLA ba dang shu dep resaiñ Bah Adelbert Nongrum uban aireng na ka tiket VPP, nangta u Dr. Aman War, DHS barim na ka UDP, Ophisar pulit ba la shongthait, Bah Mariahom Kharkrang, MLA bad Myntri barim ka sorkar, Bah JA Lyngdoh na ka Congress, Pastor Kyrsoi Pyrtuh na ka KAM bad ruh u kyrtong shimet Bah Michael Kharsyntiew.
Shwa kane, na ka la liang ka Dorbar Shnong hapoh ka jingïalam jong u Babu RS Marbañiang ka la ailad ruh ïa ki kyrtong ban kren halor kiba bun ki phang khamtam haba ïadei bad ka jingeh ha ka ïohkam ïohjam, ka pule puthi, ki samla ha ki kam ïalehkai, ka ishu khappud, ka koit ka khiah, ka Reservation Policy, ka Inner Line Permit, ka Land Transfer Act, ka jingjur ka dheng kali, bad ka jingai jingithuh ïa ki Dorbar Shnong.
Baroh hynriew ngut ki kyrtong, ki la ïoh ar sien ban pynshai ïa ki nongrim bad ka thong treikam ba ki don ha katei ka rynsan pynshai paidbah.
Ka mat ïa kren kaba kham shongshit eh ha katei ka rynsasn kadei eh halor ka ïohkam ïohjam ki samla nangta ka bamsap bad kiwei kiwei.