Nongstoiñ, Naiwieng 01: Ka leit ka wan bad ka ïaid ka ieng na Umlieh ter ter lyngba ka surok shaduh thaiñ Nongriat, ka la long kaba syrtok shisha ïa ki paidbah nongshong shnong jong kane ka thaiñ, namar ka jingsniew bad ka jingsahkut kali kaba la neh mynta la katto katne por, kat haduh ba ka la ktah shisha khamtam eh ïa kiba pang ba shitom kiba dei ban por sha ki jaka sumar.
Halor kane ka jingeh ba ki paidbah ki ïakynduh, na ka liang ka Hynñiewtrep Youths Council Umsaw Area Unit kam lah ban shu sngap, hynrei ban kynthoh tyngeh namar ka jingle sting ki bor sorkar ban shimkhia. Na ka liang ka seng ka sngew lyngngoh namar wat hapdeng ka jingujor ki paidbah bad ka seng ha u Executive Engineer jong ka PWD road, hynrei kumba long mynta ki trok ki ïaid pynkheiñ aiñ beit khlem jingsalia.
Kumba long mynta ka surok na Umlieh sha Tyllang bad Nongriat ka don hapdeng ka jingpyntrei bad la khang ruh da ki bor District ïa ki trok da ki kyndon aiñ namar kam pat long ban ïaid ki kali heh lane ban kit palat ïa ka 9 ton.Hynrei, ha ka jinglap jong ka seng bun kiba dang pynkheiñ ïa katei ka kyndon ba la pynmih da ki bor jong ka District ryngkat ka PWD.
Haduh mynta kane ka jingleh jong kine ki kali heh ka la ktah shisha ïa ka ïaid ka ieng jong ki paidbah. Ka la don ruh ka jingsahkut kali ha shilynter katei ka lynti jan man ka sngi bad kane ka jingleh ka pynjynjar ïa ki paidbah kiba leit jingleit sha ïew ne ban leit shim dawai khamtam ïa kiba ba pang ba shitom.
Shuh shuh, katkum ka jinglap jong ka seng kiba bun ki jingkieng kiba dei ban ïaid na katei ka jaka ki la jot la tor lut, namar ki la rim bad kim biang shuh ha kaba la donkam ban shna thymmai ruh kyrkieh. Hynrei, lada ki kali heh kum ki trok kiwei kiwei de ki dang ïaid sahuh ïa katei ka surok, kan don ka por ba ki jingkieng ruh ki dkut noh syndon.
Ka seng lyngba u samla Phundingstar Wahlang President Hynñiewtrep Youths Council Umsaw Area Unit, ka dawa na ka PWD kumjuh ki bor jong ka District ba ki dei ban leh ei ei ïa ki kali kiba kit palat pud kiba ïaid lyngba katei ka surok.
“Ka surok mynta ka dang dang don ha ka jingpyntrei bad ïa ki kyndon aiñ ba la pynmih ruh la pynkheiñ noh, kumta ki bor ki dei ban leh ïa kaba donkam bad ki dei ban pyni ruh bad ka kam ym tang ka ktien lane kut tang ha ka jingpynbna”, u la ong.
