Rakhe ka JJM Nichols Roy Memorial Committee ïa ka sngi khlad ba 67 jong u Rev. JJM Nichols Roy

Shillong, Naiwieng 01: Ka JJM Nichols Roy Memorial committee ha ka sngi saitjaiñ ka la rakhe ïa ka Lyngkhuh snem ka sngi khlad noh jong u Rev JJM Nichols Roy ban kynmaw ieid ïa une u nongïalam uba dei u kpa bad u nongprat lynti ïa ka Khyrnit kaba 6 jong ka Riti Synshar ka ri bad khamtam ban wanrah ïa ki Autonomous District Council sha ki jylla kiba dang dei ki riewlum kane ka thaiñ shatei lammihngi jong ka ri India.
Na ka liang ka Committee ka la shim ïa kane ka sien jam ban pynlong ïa kane ka jingrakhe bad kynmaw burom bad kumjuh ruh ïa kiba kum kine ki program shi sien shi snem kum ka dak ka jingkynmaw ieid bad burom ïa une u riew khraw jong ka ri bad ka jaidbynriew u ba long ruh u shakri bakordor jong U Blei.
Lah ban ong ba na ka liang ka Committee ka la rakhe noh ïa kane ka Lyngkhuh sngi Khlad jong une u riew khraw ha ka sngi saitjaiñ naba ha ka jingshisha kadei ban long ha ka sngi U Blei kaba dei ka 1 tarik u Naiwieng.
Ïa kane ka program lyngkhuh snem kaba 67 ka jingkhlad noh jong I Rev JJM Nichols Roy ha kaba dei ban long ha ka shi tarik u Naiwieng 2026 kaba la pynbeit da ka JJM Nichols Roy Memorial Committee la pynlong ha Lariti, Mawdiangdiang ha ka sngi saitjaiñ.
Ha ka prokram kaba lyngkot kaba la don ruh ka jingleit buh syntiew la wan ban ïashim bynta da ki dkhot nongkitkam kane ka Committee ha kaba la pynïaid ruh ïa ka prokram ba lyngkot da u Bah Ransom Sutnga, Chairman, nangta la ïoh ka jingduwai da u Bah CM Pariat, Member, la ïoh ka jingkren kaba nyngkong eh da u
DR Meros Star Rani, Member, nangta ha ka jingkren kaba ar la ïoh na u Bah H S Suting, Secretary bad kaba khatduh na I Pastor Rev. B P Phohsngap
Ha ka jingkren na ka liang kitei ki dkhot bad kumjuh ruh kiba la shah khot sngewbha ki la pynpaw ïa ka jingkmen ba kum ka Committee ka dang ïai kynmaw burom ïa une u riewkhraw uba la long u nongprat lynti ïa ka khyrnit kaba 6 bad kumjuh ruh ka jingwan ïa ka Autonomous District Council.
U Rev. B P Phohsngap haba kren u la ai burom sha u Blei ba u la sei ïa une u riew khraw uba la lah ban wanrah ïa ka khyrnit kaba 6 bad kumjuh ruh uba la long kum ka stieh ïa ki riti dustur bad ki kolshor bad khamtam eh ban ïada ïa ka khyndew ka shyiap ïa kine ki thaiñ riewlum.
“Ngi ïohi ba ha kine ki por kiba mynta ki la bun kiba la thap ban klet noh ïa ki jingnoh synniang jong une u Riewkhraw ka jaitbynriew bad lyngba ka jingshim khia jong kane ka JJM Nichols Roy Committee kaba ju kymaw beit manla u snem, ka la pynim biang ïa ka jaitbynriew ban kynmaw bad ba ym dei ban klet ïa une u riew khraw jong ka jaitbynriew,” pynpaw u Rev. Phohsngap.
Katba u Chairman ka Committee u Bah Ransom Sutnga u la ong ba kane ka dei ka sngi kaba kyrpang bha ia ka Committee bad kumjuh ruh ïa ka jaitbynriew naba la ïoh ban kynmaw burom biang ïa une u riewkhraw.
“Ha ka jingshisha ka lyngkhuh sngi khlad noh jong une u riewkhraw ka dei ha ka sngi U Blei ka 1 tarik u Naiwieng, hynrei naba ka hap ha ka sngi Sunday kumta na ka liang ka Committee ka la pynbeit ban buh ïa kane ka prokram leh burom bad kynmaw ieid ïa une u riewkhraw ha ka sngi saitjaiñ bad na ka liang ka Committee kan ym sangeh ban kynmaw ïa une u riewkhraw jong ka jaitbynriew, khamtam naba dei ma u uba la lah ban ïakhun marwei ban pynïoh ïa ka khyrnit kaba 6 bad khamtam eh ban pynïoh ïa ki District Council kiba long ka stieh jingïada ïa ka riti dustur, ka kolshor bad khamtam eh ïa ka khyndew ka shyiap,” bynrap u Bah Sutnga.
Ha kane ka sngi ka la don ka jingsangeh kaba shipor ban duwai bad ban kynmaw burom ïa u bad la pynbud pat da ka jingbuh syntiew bad ki jingkren lyngkot na kiba la shah khot sngewbha.