Yn sdang ka tnat PWD ban shna ïa ka surok ha Stand Jeep, pynbeit ki pulit ïa ka jingïaid kali

Shillong, Nailur 09: U Superintendent of Police Traffic u Dr. Hari Prasanth M.R. IPS East Khasi Hills Shillong, u la pyntip paidbah ba na ka daw jong ka jingdonkam ban shna ïa ka surok na Stand Jeep da ka ophis assistant Engineer PWD (Roads) Shillong ‘B’ Sub Division kan sdang ban pyntrei ïa ka surok Aqueduct Channel na kane ka surok kaba don ha Paltan Bazaar ka ban sdang naduh ka 10 tarik mynta u bnai tat haduh ban da pyndep ïa kane ka projek.
Kumta katkum ka kyrwoh khubor la ong ba kan don ka jingkhang ban ïaid ïa ki kali kiba wan na Paltan Bazzar sha Stand Jeep. Kan don ka No Entry ha Paltan Bazaar hajan Suman Transport na ka bynta ki kali kiba wan na Chawkhani Building sha Stand Jeep lyngba ka Paltan Bazaar.
Ka kyrwoh khubor ka ong ba la bthah ïa ki paidbah ba kin shim da kiwei pat ki lad ki lynti ha kaba ïadei bad kane ka jingeh ka ban neh tang shipor.