Nongstoiñ, Nailar 16: Ka jingrakhe ïa ka sngi laitluid jong ka ri kaba 80 snem ha West Khasi Hills District ka la long ha Madan New Nongstoiñ, ha kaba u Timothi D. Shira, Myntri ka tnad Agriculture and Farmers’ Welfare Department, Fisheries Department and Tourism Department, u la wan ban long kum u Kongsan.
U Kongsan u la pynher ïa ka lama lai rong jong ka Ri bad shim ïa ka Rashtriya Salute, kaba la pynbud sa ka March Pass da ki 25 tylli ki kynhun, ba kynthup ïa 24 tylli ki skul bad kawei ka kynhun jong ka tnad Pulit. La synran lang ïa u Kongsan da ka Hema Nayak IAS Deputy Commissioner, Bah H. Kharkongor Superintendent of Police, u Bah Sh M. Skhemlon, u nongbishar jong ka District & Session, baroh ki ADC, ki nongtrei sorkar bad kiwei ki riew don burom.
Ha ka jingkren jong u Kongsan u la pynpaw ïa ka jingkordor jong ka sngi laitluid bad ki jinglong jong ka jingïatylli bad ka jingieid ri. U la pynpaw ruh ïa ki jingjop jong ka Sorkar ha ka koit ka khiah, ka pule puthi, ki jingtei bad ka jingroi jingpar jong ka Jylla baroh kawei.
U Kongsan u la sam ruh ïa ki khusnam sha ki nongïoh khusnam bapher bapher bad ki nongjop ha ki jingïakob, kynthup ïa ka Bravery Award sha u bah Denial Born Nongsiej bad bah Robertjohn Nongsiej. Ka khusnam nonghikai ba tbit tam sha u Babu Shemphanglin Khardewsaw bad u Babu Damian Jeffery Jyrwa, nangta ki khusnam na ka bynta ki VDP bad u nongpynïaid ASHA ba bha tam, nalor kiwei kiwei de ki khusnam.
Ha kane ka jingrakhe la pyni ïa ki jingpyni kolshor da ki khynnah skul, kynthup ïa ki jingrwai ieid ri, ki jingshad tynrai Khasi bad ki jingshad kiba mihkhmat ïa kiwei pat ki jylla jong ka ri India. La sam khusnam sha ki nongjop ha ki jingïakop bapher bapher, ha kaba ka skul bah jong ka Sibsingh HSS ka la khur ïa ka nam jop ha ka March Pass. Ha ka jingïakop rwai tynrai la ïoh rah da ka skul Nongstoiñ Public School. Katba ha ka jingshad pat la ïoh rah da ka skul AG Secondary School.
La sam ruh ïa ki khusnam sha ki Best Primary Health Centre, ha kaba ka Nonglang PHC, Rambrai PHC, bad Maweit PHC ki la ïoh ïa ka jingithuh. La sam ruh ïa ki jingbam sha ki jaka ri khunswet bad ki jaka sumar hapoh ka District.
Katba ha Mawshynrut la rakhe ïa ka sngi laitluid kaba 80 snem ha madan ïalehkai Mawthengkut, ha kaba u Dr. C. Lyngdoh u ba dei u MLA ka Umsning u la long u Kongsan. Ha kane ka sngi la synran lang ïa u da u Bah S.Marweiñ MCS, ADC bad SDO ka Mawshynrut Civil Sub-Division, u Bah R.G Kharkongor MCS BDO, ryngkat kiwei ki riew rangbah.
U Dr. C. Lyngdoh u la pynher ïa ka lama Lai Rong ka Ri India, bud sa ka salute, ka jingrwai ri, ka jingjurip ïa ka march pass bad ka jingkren jong u kaba ïadei bad ka sngi laitluid. Ha kane ka jingrakhe la pyni ïa ka March Pass bad ki jingpyni kolshor na ki khynnah skul bapher bapher kiba don ha Riangdo bad ki jaka ba marjan. La ïoh ruh ban sam ïa ki khusnam sha baroh ki nongjop ha ki jingïakop kiba bun jait.
Nalor nangta la sam ruh ïa ki jingai khublei bad ki khusnam sha ki nongïoh khusnam kiba dei hok. Kum shi bynta jong ka jingrakhe, la sam ïa ki jingbam sha ki nongpang ha Riangdo CHC.
