Nongstoiñ, Risaw 22: Ka West Khasi Hills District Chess Association hapoh ka jingkhmih jong ka Meghalaya Chess Association, ïa kaba la kyrshan ruh da ka Directorate of Sports & Youth Affairs, Meghalaya, mynta ka sngi 22 tarik Risaw 2026 ka la ïoh ban pynlong ïa kawei ka lympung bah kaba la tip kum ka 49th Meghalaya State Fide Rating Chess Championship 2026 ha Nongstoiñ.
Ha kane ka lympung u bah Srally Rashir MDC ka Mawshynrut Constituency u la long u kongsan ban plie pyrda ïa katei ka lympung, ha ryngkat ka jingïasynranlang u K.Pajat General Secretary ka Meghalaya Chess Association, bah Richard Sunn President ka West Khasi Hills District Chess Association, bah Bonney Kharbani Secretary ka West Khasi Hills District Chess Association, u bah M.Dkhar sordar ka shnong Tiehsaw bad kiwei kiwei ki President ka Chess Assocïation na ki District bapher bapher jong ka Jylla Meghalaya.
Katei ka lympung kan neh haduh lai sngi lynter bad ka dei ka Open Categories ha kaba haduh 67 ngut kiba la shah jied na ki District bapher bapher jong ka Jylla Meghalaya ki la wan ban ïashimbynta. Na kitei ki 67 ngut, tang saw ngut ki ban jop na katei ka lympung kin leit ban ïakhun ïa ka senior National Championship, ka ban sa long ha ka jylla Uttar Pradesh naduh ka 29 tarik u bnai Naiwieng 2026 haduh 9 tarik u Nohprah 2026.
Ki nongkitkam kiba kham hakhmat na ka West Khasi Hills District Chess Association, ki la pynpaw ruh ka jingsngewkmen namar ba ïa katei ka lympung kaba la tip kum ka 49th Meghalaya State Fide Rating Chess Championship 2026 la ïoh ïa u Event Code na ka All India Chess Federation bad jingithuh na ka World Chess Federation (FIDE).
U kongsan haba ai jingkren ha kane ka sngi plie u la ong ba um da don jingtip than shaphang kumno ban ïalehkai, hynrei u shu tip ba ka dei ka jingïalehkai kaba don burom bad kaba pynproh jabieng.
Na ka liang u kongsan u la ai khublei kitbok kit rwiang bad kyrkhu kyrdoh ruh, ba kane ka lympung kan long ka jingkyrkhu bad kan sei ïa ki sap nylla jong ki samla, khamtam kito ki ban sa shah jied ba kin wanrah burom ïa ka Jylla baroh kawei.
