Pynkhreh 3 ngut ki nongïalehkai Pencak Silat na Meghalaya ban mihkhmat ïa ka India ha ka World Championship

Nongpoh, Risaw 22: Ka Meghalaya Pencak Silat Association ka la pynkhlaiñ ïa ka jingai jinghikai bad jingpynkhreh ïa ki lai ngut ki nongïalehkai na Meghalaya kiba la jied ban mihkhmat ïa ka ri India ha ka 6th Junior bad 21st Senior World Pencak Silat Championship 2026 (Men & Women), ka ban long naduh ka 5 haduh ka 12 tarik u Nohprah 2026 ha Tashkent, Uzbekistan.
Ïa ka jingai jinghikai la pynlong ha Madan Umling, ha kaba ar ngut ki coach na Nagaland, u Ekbin Kumar bad u John Kumar, ki la ai jinghikai ban pynjanai shuh shuh ïa ka sap bad ka rukom ïalehkai jong kine ki nongïalehkai.
Kine ki lai ngut kiba la jied ban mihkhmat ïa ka India ki long ka Samla Rimchi Sangma, u Samla Philip Khymdeit bad u Samla Tobias Klein.
Ha kane ka sngi, u President ka Meghalaya Pencak Silat Association, Bah Dipshon Ryntathiang, ryngkat bad u General Secretary, Bah Thomas Rangthaluh, ki la leit ban ai mynsiem ïa kine ki nongïalehkai bad kyntu ïa ki ban trei shitom bad pynjanai shuh shuh ïa ka rukom ïalehkai, khnang ba kin lah ban wanrah ïa ka nam bad ka burom ïa ka jylla Meghalaya bad ïa ka ri India hi baroh kawei.
La donlang ruh ha kane ka sngi u Rangbah Shnong ka Umling, Bah Commend Wahlang, u Secretary Shnong, Bah Bining Lapang bad kiwei kiwei ki riew rangbah.